Xanana Gusmão husu joven Covalima labele provoka malu
COVALIMA, 28 abríl 2023 (TATOLI)—Prezidente Partidu Conselho Nacional Reconstrucão Timorense (CNRT), Xanana Gusmão, husu ba joven-sira iha munisípiu Covalima atu labele provoka malu maibé tenke hatudu maturidade polítika.
Notísia Relevante: CNRT hakarak lori Governu hakbesik ba povu Covalima
“Joven sira iha suai ha’u fiar imi katak, ita tenke fo ezemplu ho maturidade poítika. Katak, partidu CNRT iha ona tinan 16, imi balun boot liu partidu CNRT, imi tenke hatudu maturidade polítika atu labele provoka no labele reponde provokasaun hosi militante partidu seluk,” Xanana Gusmão hateten iasuntu ne’e bainhira hato’o nia programa iha kampaña eleitorál ho tipu komísiu iha kampu Ladi Camanasa, Covalima, sesta ne’e.
Razaun Prezidente partidu CNRT hateten ba joven sira labele responde provokasaun hosi nilitante partidu seluk no tenke asegura partidu CNRT liuhosi dame, domin no eatabilidade nune’e bele lori rai Timor-Leste ba oin.
“Ho nune’e tenke respeita mós partidu seluk hodi foti liman labele provoka no estraga malu, ida-ne’e importante. Nune’e, buat boot atu mai ba ita hotu la’ós ba Suai de’it,” nia apela.
Iha atividade kampaña ne’e, prezidente partidu Conselho Nacional Reconstrucão Timorense (CNRT), Xanana Gusmão, mós fó edukasaun sívika ba nia militante sira no husu ba fiskál sira atu servisu makaas hodi fó vitória ba partidu iha eleisaun parlamentár.
Entertantu, iha 13 marsu 2023 ne’e, Prezidente Repúblika José Ramos Hosra dekreta ona loron eleisaun ne’ebé sei akontese iha loron 21 fulan-maiu tinan 2023.
Bazea ba kalendáriu ne’ebé Komisaun Nasionál Eleisaun (CNE-sigla portugés) aprova, partidu polítiku sira hahú hala’o kampaña eleitorál hahú iha loron 19 fulan-abríl ne’ebé sei ramata iha loron 18 fulan-maiu tinan 2023 ne’e.
Daudaun ne’e, partidu polítiku ne’ebé mak hala’o ona kampañia eleitorál iha munisípiu Covalima mak hanesan Partidu Dezenvolvimentu Nasionál (PDN), Partidu Os Verdes de Timor (PVT), partidu Democrata Cristão (PDC), Partidu FRETILIN, Partidu Repúblikanu (PR) no partidu UDT ne’ebé kansela nia atividade kampaña eleitorál, partidu PLPA no partidu CNRT.
Jornalista : Celestina Teles
Editór : Cancio Ximenes
