DILI, 28 abríl 2023 (TATOLI) – Klube Karketu Dili FC sai kampiaun ba Primeira Divizaun Liga Futebol Timor-Leste (LFTL) bainhira halakon nia adversáriu Portu Taibessi ho golu1-0 iha estádiu Munisipál Dili, sesta ne’e.
Klubu Karketu Dili FC rekolle pontu 3 hosi nia adversáriu Portu Taibessi no aumenta pontus no sa’e ba 18 iha tabele klasifikasuan Jogu Primeira Divizaun LFTL no automatikamente sai kampiaun ba kompetisaun jogu LFTL iha époka 2023 nian.
Diretór Relasaun Públiku Liga Futebol Timor-Leste, Deogo Neto Fraga ba jornalista sira katak ohin loron 28 abríl tinan 2023 ita konsege hetan kampiaun ba LFTL ba Primeira Divizaun nian maka Karketu Dili FC ho pontus kumulativu 18.
“Entaun la iha klubu ida maka atu atinje pontus 18 refere, entaun Karketu Dili FC mak sai kampiaun”, Diretór Relasaun Públiku Liga Futebol Timor-Leste, Deogo Neto Fraga.
Diretór ne’e mós reforsa, tuir regulamentu kompetisaun atigu 62 nian, bainhira kompetisaun seidauk hotu maka klubu ida iha serteza sai kampiaun. Orgaun LFTL, tenke atribui kedas medalla, tasa no prémiu osan ba iha klubu refere.
Hafoin jogu remata, orgaun LFTL entrega kedas medalla, tasa kopetisaun no mós ho prémiu osan ho montante $ 10. 000,00 ba Klubu Karketu Dili FC ne’ebé sai kampiaun ba jogu Primeira Divizaun LFTL.
Treinadór Karketu FC, António Timotio fó parabens ba jogadór Karketu Dili FC tanba bele mantein nafatin títulu kampiaun nain ba dala-tolu. Ami nai esforsu atu sai kampiaun, la’os menan hotu de’it jogu sira maibé aprende hosi derota no to ikus bele sai kampaiun.
“Iha inísiu, ekipa Karketu Dili FC derota dala-rua no la iha esperansa atu sai kampiaun”, Treinadór Karketu FC, António Timotio dehan.
Iha parte seluk, Jogadór Karketu Dili FC Paulo Galy ho núemru kamizola 21 ne’e agradese ba estrutura Karketu Dili FC, hahú hosi treinadór to’o mai jogadór sira, ami-nia esforsu nia objetivu maka atu sai kampiaun LFTL époka 2023.
Adeptus Karketu Dili FC, Sujana Suares Guteres, reforsa gosta ka la-gosta rezultadu ikus hatudu Karketu Dili FC mak sai kampiaun iha LFTL nain. Hanesan adeptu ba klubu Karketu Dili FC konsidera derota dala-rua iha primeiru jogu LFTL, ami-nia fuan nakdoko, tauk no lahatene Karketu Dili FC atu ba lo’os iha ne’ebé.
“Maibé rezultadu ikus mak nune’e hanesan liafaun ida hateten nune’e, servisu ho silénsiu no rezultadu mak barollu”, nia konklui.
Jornalista: Francisco Sony
Editór : Zezito Silva
