LIQUIÇA, 29 abríl 2023 (TATOLI)— Partidu Movimentu Libertasaun Povu Maubere (MLPM) ho númeru sorteiu 14, sábadu ne’e, kansela tan nia kampaña daruak iha Munisipiu Liquiça ho atividade kampaña ho tipu uma ba uma (door to door) no komísiu politika.
“Kampaña iha Liquiça ohin kansela, tanba iha fallansu ida ka rua husi ami,” Prezidente Partidu MLPM, Reis Kadalak informa direita ba Tatoli via telefonika, sábadu ne’e.
Tuir observasaun iha tereñu hahú husi tuku 10:00, dadeer ne’e, Polísia Nasionál Timor-Leste hamutuk ho missaun observador sira hanesan PDHJ, CNE inklui jornalista husi media sira Radio Tokodede no Radio Televisão Timor-Leste konsentra ona iha merkadu Munisipál Liquiça hodi hein prezensa partidu MLPM. Maibé la konsege realiza.
Ofisíal Fiscalizasaun no Rekomendasaun PDHJ, Catarina Conceição ne’ebé hein hela hodi hala’o missaun observador konfirma kanselamentu ida ne’e ba daruak ona, nune’e CNE presiza anota hodi hato’o na nasional.
Hatan ba kestaun ne’e Diretór CNE (Komisaun Nasionál ba Eleisaun) Munisipiu Liquiça, Celistiano Xavier ba Agência Tatoli deklara katak dezisaun kansela kampaña eleitorál husi Partidu MLPM ne’e rasik ba dala rua ona, sura hamutuk ho antes ne’e 22 abríl 2023.
“Antes iha Postu Administrativu Maubara mós kansela tanbá iha asuntu tékniku, ohin dader mak rona fali tan dehan MLPM kansela, nune’e rekomendasaun no sujestaun sira, ami halo ona anotasaun diária no sei ba hato’o iha nasionál,” dehan Celistiano Xavier.
Nia esplika, tuir oráriu husi CNE nasionál, partidu MLPM laiha ona oportunidade hodi halo kampaña iha Munisipiu Liquiça, bainhira atu realiza fila-fali tenke iha komunikasaun no karta ba fali CNE.
Ho kanselamentu kampaña eleitoral Partidu MLPM ne’e seidauk iha informasaun adisaun kona-ba oráriu kampaña foun iha Munisípiu Liquiça, nune’e Partidu MLMP konfirma kontinua atividade kampaña eleitorál iha Suku Humboe, Ermera iha loron 30 abríl 2023.
Jornalista : Cidalia Fátima
Editór : Florencio Miranda Ximenes
