LAUTÉM, 30 abril 2023 (TATOLI)– Prezidente Partidu Demokrátiku (PD), Mariano Assanami Lopes, iha nia kaMpaña polítiku iha Lautém hateten, PD sei dezenvolve agrikultura no turizmu iha Munisípiu Lautém.
Prezidente Partidu ne’e deklara, atu hadi’a povu nia moris presiza intensiva ba setór turizmu no agriKultura ne’ebé integeradu ho sistema irrigasaun maka di’ak ba povu nia natar no to’os, hodi kuda ai-han oioin nune’e bele diversifika ekonomia husi baze.
“Lautém iha poténsia ba agrikultura. Natar no to’os barak mak abandona iha Lautém, tanba sistema irrigasaun mak ladun integradu, tanba ne’e karik PD kaer ukun, sei dezennvolve agrikultura ho sistema irrigasaun ne’ebé integeradu hodi bele fornese bee ba komunidade nia natar no to’os, no kuda ai-han lokál atu bele diversifika ekonomia familía hosi baze,”Assanami hato’o kompromisiu polítiku ne’e Militante no Simpatizante PD iha kampu futeból 28 novembru eis kampu 745 Lospalos, domingu ne’e.
Líder partidu polítiku ne’e haktuir, dezenvolve setór turizmu iha Lautém ho objetivu, atu fó kbiit ba juventude hodi kria turizmu komunitária iha Lautém, hodi nune’e bele atrai turista internasionál no lokál hodi intensiva diversifikasaun ekonomia iha Lautém.
“Parke Nasionál Nino Koni Santana, Iralalaru, Com no fatin sira seluk sai hanesan poténsia ba área turizmu iha Lautém. Tanba ne’e, PD sei dezenvolve fatin hirak ne’e atu sai hanesan fatin destinasaun turístiku hodi atrai turista sira hodi mai vizita atu fó rendimentu ekonomia ba povu no juventude Lautém, hodi diversifika ekonomia ida sustentável iha Timor – Leste,” nia hateten.
Alén de dezenvolve setór importante rua ne’e, PD mós afirma nia programa prioridade rua ba povu Laútem maka hanesan:sei hadi’a Estrada hosi Postu administrativu Lautém to’o Lospalos Vila no sei harii institutu politékniku ba estudante husi Lautém.
Asanami esplika, PD nia programa hadi’a Estrada, atu fasilita povu agrikultór sira hodi bele asesu ba fatin importante sira.
“Bainhira PD kaer ukun, iha tinan primeiru sei foka liu ba strada aat sira iha Timór laran tomak, inklui estrada husi Lautém vila to’o Lospalos vila, nune’e povu bele uza hodi hala’o movimentasaun transporte públiku, bele fasilita povu agrikultór sira atu fa’an produtu lokál iha merkadoria nune’e bele diversifika ekonómia iha Timor – Leste,” nia garante.
Liga ba PD nia programa atu harii eskola, prezidente Partidu Demokrátiku (PD) ne’e reforsa katak harii Institutu Politékniku, hodi fó kbiit ba estudante sira, nune’e bele kontinua sira-nia eskola, hodi dezenvolve Munisípiu Lautém ba moris di’ak povu nian.
Nia hateten, kompromisiu harii eskola ne’e, nu’udar promesa ne’ebé Governu Anteriór promete ona atu harii tinan hirak liu ba maibé seidauk realiza, nune’e PD kompromete sei harii bainhira povu Lautém fó fiar.
Jornalista: Camilo de Sousa
Editora: Nelia Borges
