MANANUTO, 01 maiu 2023 (TATOLI)- Komisaun Nasionál Eleisaun (CNE) hamutuk Sekretariadu Tékniku Administrasaun Eleitorál (STAE) Munisípiu Manatuto, segunda ne’e, fó formasaun kona-ba matéria krime ba ofisiál eleitorál 120 iha postu administrativu Barique, munisípiu Manatuto.
“Ohin, ha’u akompaña ho STAE hodi fó formasaun ida kona-ba krime eleitorál ba ita-nia ofisiál eleitorál hamutuk 120 iha postu administrativu Barique,” Diretór CNE Manatuto, Paulino Soares, hateten ba Agência Tatoli liuhosi telefónika.
Objetivu hosi formasaun ne’e atu aumenta sira-nia koñesimentu no hasa’e sira-nia kapasidade, nune’e bele partisipa iha eleisaun parlamenta, hahú hosi simu materiál sensitivu no naun sensitivu to’o iha eleisaun ne’ebé sei akontese iha 21 maiu 2023 ne’e.
“Ita-nia objetivu fó formasaun ne’e atu oinsá ita-nia ofisiál eleitorál entende didi’ak papel sira-ne’ebé iha loron eleisaun. Tanba, matéria krime eleitorál ne’e importante hodi ita fó ba ita-nia ofisiál eleitorál, nune’e bainhira eleisaun labele akontese erru ruma,” nia hateten.
Tanba, tuir nia, antes tama eleisaun órgaun eleitorál sira tenke fó formasaun ba ofisiál eleitorál nune’e bele kompriende saída mak krime eleitorál.
“Antes, ita seidauk tama eleisaun, ita iha matéria tolu liuliu kona-ba sistema eleitorál, kampañia eleitorál no sistema eleitorál ne’ebé baibain ita hanaran edukasaun sívika. Maibé iha eleisaun antes-antes ne’e STAE la aprezenta matéria krime eleitorál ba ofisiál eleitorál maibé ba tinan ne’e ami hahú fó matéria ne’e,” nia hateten.
Paulino dehan, matéria ne’e tenke fó ba ofisiál eleitorál nune’e entende no kompriende tanba iha balun ne’ebé la komprende, no bainhira ofisiál eleitorál ka brigada mak tuir kampañia ne’e krime ka viola regra.
Dadus eleitór provizóriu iha Manatuto 36.000-resin iha munisípiu Manatuto Vila, Soibada, Barique, Laclo, Laclubar no Natarbora.
Jornalista : Osória Marques
Editór : Cancio Ximenes
