AILEU, 01 maiu 2023 (TATOLI) – Komandante PNTL Munisípiu Aileu, Superintendente Polísia Ludgerio Picancio Madeira Lay, apresia maturidade povu Aileu, tanba durante atividade kampaña eleitorál kontribui ba pás no estabildade.
“Ha’u apresia no louva povu Aileu tanba durante ne’e, hahú hosi kampaña to’o agora kontribui ba situasaun hakmatek”, Madeira dehan liuhosi nia intervensaun bainhira fó posse ba Ofisiál Polísia nain tolu iha Komandu PNTL Munisípiu Aileu, segunda ne’e.
Nia esplika, povu Aileu la’os foin hatudu maturidade hodi kontribui ba pás no estabiidade, maibé dezde Timor-Leste nia independénsia.
“Ha’u mai ona komandante dala rua iha ne’e, iha ha’u nia kargu hanensan Komandante Munsípiu Aileu no to’o ha’u mai fila fali mai iha ne’e, maibé to’o ohin loron, ha’u seidauk haree Aileu rejista kazu krime ruma iha kampaña no eleisaun, Aileu ne’e situasaun hakmatek”, nia konklui.
Jornalista: Natalino Costa
Editór : Zezito Silva
