MANUFAHI, 05 maiu 2023 (TATOLI) – Prezidente Partidu Dmokrátiku (PD) Mariano Assanami Sabino, hateten bainhira povu fó konfiansa ba PD iha eleisaun mak sei reforsa liután setór justisa hodi harii tribunál rejionál sira atu atende justisa ho di’ak.
“Ita-nia prokuradór sira agora iha ona kualidade, advogadu sira mós hanesan, sira ne’ebé servisu iha Ministériu Públiku sira halo tia ona servisu ne’ebé di’ak, maibé ita presiza reforsa liután, presiza harii tribunál rejionál sira, prokuradór rejionál sira tenke kaderniza didi’ak”, Assanami dehan iha kampaña aberta ne’ebé hala’o iha Luak Munisípiu Manufahi, sesta ne’e.
Nia dehan, tribunál tenke asegura justisa ba ema hotu, justisa ne’ebé los, la’os justisa ba ema kiik de’it, ema bo’ot laiha.
“Justisa tenke hanesan ba ema hotu, la’os kaer ema tau iha sela baku to mate to’o ikus laiha justisa, ita labele aseita ida ne’e, la’os iha fronteira kaer ema, tuku kedan, kaer ema tebe kedan, ne’e presaun, ne’e militár Indonézia mak halo buat ne’e, Timor-Leste ukun aan ona, lei mak deside de’it iha tribunál ema ne’e los ka sala, tribunál mak julga, la’os instituisaun seluk mak julga fali, ho nune’e PD hakarak hadia sistema sira ne’e”, Assanami hateten.
Nia hatutan, PD konsege hetan númeru sorteiu haat ne’e tan natureza mak fó tuir ai-rin haat ne’ebé iha, Prezidente Repúblika, Governu, Parlamentu Nasionál no Tribunál Rekursu, númeru haat ne’e atu hadia tanba PD ba Estadu.
“PD nia polítika atu hadia, labele ódiu malu, labele izola malu, ataka malu, uza fali polítika ida ne’e labele, labele uza poder konfiansa povu nian hodi hanehan fali lider sira seluk ida ne’e ba PD labele”, nia dehan.
Tanba ne’e, PD atu implementa planu no programa sira hotu, nia husu ba militante sira atu fó konfiansa makas ba PD hodi manán atu realiza programa no polítika sira.
Kampaña ba partidu polítiku ne’e hetan seguransa másimu hosi Polísia Nasionál Timor-Leste (PNTL) Munisípiu Manufahi, superviziona direta hosi Komisaun Nasionál Eleisaun (CNE-sigla portugés) no monitoriza hosi Provedoria Direitu Humanu no Justisa (PDHJ).
Jornalista: Hortencio Sanchez
Editór : Zezito Silva
