OÉ-CUSSE 01 maiu 2023 (TATOLI) – Partidu Demokrata Kristaun (PDC, sigla portugés), ho númeru sorteiu 16, segunda ne’e realiza kampaña eleitorál ho tipu door to door iha suku Naimeko, Rejiaun Administrativa Espesiál Oé-Cusse Ambeno (RAEOA).
Prezidente PDC, Francisco de Araújo, introdús programa prioridade ba eleitór sira katak, bainhira hetan fiar hosi povu atu ukun iha nonu Governu liuhosi eleisaun lejizlativa, sei dezenvolve infraestrutura bázika, hanesan bee-moos, estrada ponte no eletrisidade, no hakarak aselera infraestrutura bázika sira-ne’e hosi baze ba kapitál hodi fasilita komunidade transporta produdu asesu ba merkadu.
Nia husu atu vota vota Partidu PDC ho númeru sorteiu 16 iha loron 21 fulan maiu 2023 ne’e.
“Ita-nia programa foku ba infraestrutura bázika, ba estrada ponte no mós dreinajen inklui bee-moos, tanba tuir Partidu PDC nia haree, durante ne’e ita haree dezenvolvimentu la’o aselera hosi kapitál mai iha munisipíu de’it, maibé ita haree hosi postu administrativu sira ba suku no aldeia sira kondisaun grave tebes, atu fasilita komunidade transporta produtu asesu ba merkadu, Prezidente PDC, Francisco de Araújo, ko’alia iha suku Naimeko.
PDC hakarak aselera dezenvolvimentu ne’e tenke hahú hosi suku maka mai sidade, labele hahú hosi kapitál mak ba fali suku, tanba povu nia nesesidade ne’e mai hosi aldeia no suku sira.
“Durante ne’e Ministériu Obra Públika (MOP), akumula funsaun rua, ida maka ADN no MOP rasik, bele akontese konfuzaun ba kompañia sira iha prosesu fiskalizasaun ba projetu fíziku sira, nune’e PDC kompromete bainhira integra iha nonu Governu sei halakon ADB hodi reforsa MOP nia kontrolu iha terrenu,” nia katak.
Asuntu bee-moos, durante ne’e komunidade kestiona ba infraestrutura bee-moos tantu iha sidade no baze, nune’e PDC iha programa atu konstrui barrajen (bendungan), hodi instala mákina produsaun atu fornese bee-moos ba komunidade.
“Tan ne’e ita hanoin ba futuru PDC lidera Governu dasia, PDC sei konstrui barrajen iha Bobonaro-Loes, hodi fornese bee ba natar sira, no uza mákina modernu hodi fornese bee ba komunidade, no mós konstrui ida iha Maliana, tanba fatin produtivu ba natar sira, nune’e konstrui ida iha sidade Díli, tanba ema barak hotu konsentradu iha kapitál nasaun, mós sei konstrui iha Tasi-Mane, hanesan Covalima, entaun ita hakarak aselera ida-ne’e,” nia katak.
Vise-Prezidente Partidu PDC, Domingos da Costa, reforsa, bainhira PDC hetan asentu iha Parlamentár liuhosi eleisaun lezilativa períodu 2023-2028 primeiru sei hadi’a sistema eletrisidade, no oferese liña eletrika gratuita ba kbiit laek sira.
“Durante ne’e akontese preokupasaun boot ba konsumidór sira, la’ós liña mak fallansu maibé sistema prepago fa’an pulsa, halo komunidade preokupa tanba konsumidór sira hein kuaze loron ida tomak atu hetan pulsa, tanba laiha tékniku ida profisionál atu kontrola espesiál ba sistema sira-ne’e,” nia katak.
Nune’e nia husu ba povu Oé-Cusse fó votu ba PDC, PDC sei moderniza buat hotu-hotu, tenke halo buat-ne’ebé di’ak, no programa ida mak kbiit laek, lahetan rendimentu ruma, sei fornese ahi gratuita 21 kwh ba kbiit laek sira, tanba agora Governu fahe hela osan $200 dollar kada família, maibé joven nafatin sai vítima, entaun PDC rekomenda husu ba povu Oé-Cusse para depozita votu konfiansa ba PDC hodi kaer ukun atu dezenvolve setór hotu.
Entretantu, PDC hala’o kampaña ho tipu fahe stiker ne’e, hetan observasaun hosi Komisaun Nasionál Eleisaun (CNE, sigla portugés) no Polísia Nasionál Timor-Leste (PNTL).
Jornalista: Abílio Elo Nini
Editór: Evaristo Soares Martins
