LIQUIÇA, 01 maiu 2023 (TATOLI)– Partidu Libertasaun Popular (PLP) hakarak lori prioridade tolu ba povu nia moris bainhira hetan konfiansa hodi lidera governasaun tuir mai.
Komprimisiu hirak ne’e hato’o husi Prezidente PLP, Taur Matan Ruak liu husi kampaña eleitoral ba dahuluk iha munisipíu Liquiça ne’ebe realiza iha Kampo Futebool, segunda semana ne’e.
Nia esplika, governu PLP nia prioridade mak ema, ema no ema no prioridade ne’e fahe ba tolu mak hakarak ema moris diak no vida naruk, oan sira tenke matenek domina siensia no teknologia, no kualidade ema moris tenke diak.
“Ita hotu tenke iha saúde diak no bele moris naruk. Ita nia oan sira tenke matenek no domina iha siensia no teknolojia. Ita hakarak ema hotu iha kualidade moris diak liu-liu nesesidade loron-loron, ida ne’e mak hau nia preokupasaun no governu ne’ebé ha’u lidera nia preokupasaun,” Taur Matan Ruak dehan iha nia intervensaun liu hosi komisiu kampaña eleitoral ne’ebe halao dahuluk iha munisípiu Liquiça.
Atual Primeiru Ministru ne’e kompremete sei kontinua implementa programa ne’ebé antes ne’e governu da-ualu estabelese ona liu husi nia lideransa hanesan mantein subsídiu uma kain, bolsu estudu, hadia veteranus nia moris, uma naroman ba povu, Bolsa da Mãe Jerasaun foun no seluk tan.
Taur Matan Ruak afirma agora laiha ona tempu hodi soran no trata malu tanba tinan barak Timor-Leste lakon ona nia tempu ho krize oin-oin ne’ebé mosu, no dala ida tan ho konfiansa povu ba PLP sei fo tempu hodi dudu nasaun ba oin.
“Ha’u hakarak imi kontente, Kuu buat ne’ebé ita kuda. Kuda agora ita la kuu, ita nia oan sira sei kuu to beioan sira. PLP lakoi atu trata malu tanba agora tempu ona ita dudu nasaun ba oin. Ha’u prontu hamriik hodi servi imi, no agora saida mak imi halo mak ho imi nia votu sei fo ba PLP. Ne’e mak ami nia mehi,” nia dehan.
Parte seluk, Kordenador PLP Munisípiu Liquiça, Hito Carvalho de Jesus husu militante no simpatizante sira dala ida tan afirma atu lori PLP ba kaer ukun no prontu lori Taur Matan Ruak sai Primeiru Ministru lidera governu ba dala-sia.
“Dalan ba moris diak sei naruk, ita presiza lider diak hodi lidera ita hodi sai matadalan no líder ne’e mak Taur Matan Ruak. Lider ne’ebé hanoin povu, estável, iha kontrolu ba nia lideransa, iha vizaun klaru ba moris diak no lori povu atinje mehi ida ne’e,” Hito Carvalho de Jesus hateten.
Kampaña Eleitoral husi PLP ne’e rasik hahu iha tuku 15:00 lorokraik no hetan seguransa husi PNTL inklui misaun observasauan hanesan CNE, RENETIL, PDHJ no seluk tan.
Jornalista : Cidalia Fátima
Editora : Armandina Moniz
