Ataúru, 02 maiu 2023, (TATOLI)– Autoridade Munisípiu Ataúru sei konstrui “Uma Naroman ba Povu” hamutuk sia, ba familía vulnerável iha suku mau-meta vila, Munisípiu Ataúru tinan ne’e.
Sekretáriu munisípiu Ataúru, Lúcio Boromeu de Araújo hateten, oras ne’e tama ba faze resitasaun ba programa ‘Uma Naroman Ba Povu’, iha munisípiu Ataúru, espesiál iha suku Vila Mau-Meta.
Nia haktuir, iha faze resitasaun ne’e presiza komunidade hotu atu partisipa tanba programa ‘Uma Naroman ba Povu’ ne’e loke ba Públiku, maibé iha kritériu balun ne’ebé mak presiza prenxe atu sai benefisiáriu ba program refere.
“Tanba ne’e husu ba públiku atu bele prenxe rekizitu, nune’e iha tinan ida ne’e ita sei konstrui tán uma ba komunidade iha suku vila mau-meta. Kritéria sei bazea ba kondisaun ekonómia hosi familía, kondisaun fíziku uma nian, inklui rekezitu balun ne’ebé presiza prienxe maka hanesan tenke kaben-na’in, iha Kartaun Eleitorál, sertifikadu rai no fixá família,”Lúcio Boromeu de Araújo informa ba Tatoli iha nia knaar fatin iha suku Mau-Meta villa, tersa ne’e.
Sekretáriu Munisípiu ne’e esplika, hafoin benefisiariu sira finaliza prosesu rejistrasaun, maka rekezitu sira ne’e, sei submete ba Administradór hodi deside benefísiariu ba programa refere.
“Iha Munisípiu Ataúru, familía hamutuk 12 maka submete dokumentu ba programa ‘Uma Naroman ba Povu’ maibé Administradór deside benefísiariu sia hosi totál 12 benefísiariu ne’ebé submete ona dokumentu. Ekipa espesiál kompostu husi autoridade suku, Autoridade munisipál no PNDS sei halo verifikasaun hodi observa direita kondisaun família benefisiáriu na’in sia nia uma hafoin hahú konstrusaun,”
Diretór PNDS munisípiu Ataúru, Aniceto Magno de Araújo haktuir, PNDS mós fó asisténsia téknika hodi asegura uma sira ne’e, la sai ameasadu ba vida no bele asegura familía hela ho seguru no dignu.
“Ita apoiu iha dezeña, Bill of Quantity (BoQ), prosesu konstrusaun iha faze inísia to’o remata,” nia hateten.
Iha sorin seluk, Xefe suku Vila Mau-Meta, Filipe Ximenes, hateten, iha prosesu konstrusaun ‘Uma Naroman Ba Povu’ kontribuisaun husi parte benefisiáriu presiza tebes atu mellora liután program ida ne’e.
“Benefisiáriu sira presiza tebes fó sira-nia kontribuisaun hodi asegura programa ida ne’e bele la’o ho di’ak. Ita presiza kontribui materiál konstrusaun balun karik nesesita, hanesan rai-henek, fatuk, ai no seluk tán,” Xefe suku informa
Nia esklarese tan katak bainhira kontribui ona materiál balun, ne’e la signifika ko’a ka redús orsamentu husi programa refere ba hadi’a uma ne’e.
“Orsamentu ne’ebé mak iha sei rezerva hela, hodi bele sosa fali materiál uma-laran hanesan kama, kulsaun, meza, kadeira no seluktán,” nia esplika.
Entretantu tuir dadus hosi munisípiu Ataúru, iha tinan 2023, família hamutuk na’in sia maka asesu ba ‘Uma Naroman ba Povu’ ho totál orsamentu $153.000, hosi totál orsamentu ne’e kada uma sei hetan $ 17.000. aloka hosi orsamentu Estadu tinan 2023.
Antes ne’e iha tinan 2021, benefisiáriu ba Uma kbi’it la’ek iha Munisípiu Ataúro hamutuk tolu no iha tinan 2022 benefisiáriu hamutuk sia.
Jornalista : José Belarmino De Sá
Editora : Nelia Borges
