LIQUIÇA, 02 maiu 2023 (TATOLI)– Partidu Centro Ação Sosial Demokrático Timorense (CASDT) tersa semana ne’e kontinua realiza nia mini kampaña eleitoral iha Munisípiu Liquiça no kompremete sei dezenvolve potensia sitíu turistíku istóriku sira.
“Iha Liquiça potensia barak hanesan Turismu, iha tasi ibun luan tebes no liga kedas Fronteira Maritima ho Indonezia. Liquiça fatin istoria no ita iha monumentu boot rua Maubara no Aipelo ne’ebé to’o agora abandona hela,” Prezidente Interino CASDT, Isac do Rosário koalia liu husi nia intervensaun iha mini kampaña eleitoral, ne’ebe halao iha Suku Maumeta, Liquiça Villa.
Isac do Rosário afirma bainhira CASDT hetan fiar husi povu iha Eleisaun Parlamentar mak sei halibur investor sira hodi hamutuk dezenvolve sitíu turistíku sira liu husi loke Hotel no Restorante ho estandar internasional nune’e bele fo oportunidade servisu ba Liquiça oan sira.
“Konaba turizmu ita nia emprezariu sira agora halo Hotel Lokal deit no estadu tenke tulun sira atu nune’e haboot negosiu no loke kampo servisu boot liu tan. Monumentu iha Maubara no Aipelo, tinan ba tinan laiha manutensaun no husik abandona hela maske ida ne’e rikusoim Timor nian. Ita bele hadia no halo diak nomos halo rehabilitasaun nune’e ema bele mai vizita Liquiça,” nia esplika.
Maske iha potensia ba ida ne’e, CASDT mós hakarak transforma lixeiru Tibar ho makina avansadu sira nune’e foer ne’ebé soe la presiza sunu maibé makina mak sei dulas nune’e nia impaku ba ambiente bele redus no inklui asegura saúde pessoal husi populasaun hela besik area lixeiru Tibar.
Iha fatin hanesan Vise Prezidente Partidu CASDT, Paulo Valente nota maske populasaun maioria Liquiça moris hanesan peskador maibé fasilidade ou makina ba peska nian la sufisiente no presiza apoiu hodi hadia ekonomia peskador sira nian.
“Ita boot sira uza hela makina tradisional hela no maske halo nune’e maibé la sufisiente, ita tenke iha makina boot rasik hodi sustenta peskador sira,” Paulo Valente hateten.
Vise Prezidente CASDT husu ba simpatizante no militante sira ne’ebé partisipa iha Mini Kampaña ne’e atu fo fiar ba CASDT liu husi hili numeru 13 iha loron 21 maiu 2023 no nafatin tenke vota ho konsiensia no resposabilidade tanba ida ne’e mak sei garante governasaun ba tinan lima mai.
Kampaña Eleitoral husi CASDT ne’e rasik hahu iha tuku 02:00 lorokraik no hetan seguransa husi PNTL inklui misaun observasaun hanesan CNE, RENETIL, PDHJ no seluk tan.
Jornalista : Cidalia Fátima
Editora : Armandina Moniz
