CNC, I.P sei apoiu uma ba sobrevivente haat
DILI, 02 maiu 2023 (TATOLI)—Sentru Nasionál Chega!, Institutu Públiku (CNC, I.P sigla portugés) tinan ne’e sei apoiu tan ‘uma memória esperansa’ ba sobrevivente konflitu pasadu Timor-Leste nian hamutuk na’in-haat.
Diretór Divizaun Solidaridade Sobrevivente iha CNC,I.P, Nelson Miranda Seixas, hateten, sobrevivente sira-ne’ebé mak sai benefisiáriu ba uma ne’e merese duni tanba apoiu ida-ne’e hanesan parte ida hosi programa reparasaun ba vítima no sobrevivente sira.
“To’o tinan kotuk ita apoiu ona uma ba sobrevivente hamutuk 15 no tinan ida-ne’e kontinua apoiu tan ba ema na’in-haat,” Diretór informa ba Agência Tatoli iha ninia knaar fatin, Antigu Komarka, Balide, tersa ne’e.
Notísia relevante : CNC diskute elaborasaun planu estratéjiku muzeu memoriál Covalima períodu 2023-2027
CNC, I.P serbisu hamutuk ho Asosiasaun Vítima hodi fó apoiu uma liuhosi programa reparasaun ba vítima no sobrevivente sira ba konflitu polítiku ne’ebé mak akontese iha pasada.
“Ita hein katak iha tinan ne’e nia-laran, ita sei oferese ba sira-ne’ebé mak presiza liu katak sira uluk vítima no sai sobrevivente, hafoin ita ukun-an tiha, iha balun ne’ebé mak ho kondisaun uma ladi’ak,” nia dehan.
Orsamentu ne’ebé prevee kada tinan atu apoiu uma ba sobrevivente ne’e depende ba ninia kuantidade uma, desde tinan kotuk to’o agora uma ne’ebé fó apoiu ne’e ho nia medida 7x9m kompostu hosi kuartu tolu, haris fatin iha laran, no dapur iha li’ur.
“Osan ne’ebé ita tau ne’e ba tinan kotuk kada uma ida hetan $14.000 to’o $15.000, maibé ba tinan ida ne’e orsamentu tun entaun uma haat ne’e nia orsamentu hamutuk $50.000, signifika kada uma ida sei hetan $12.000 ho nia medida nafatin 7x9m,” Diretór tenik.
Jornalista : Arminda Fonseca
Editora : Julia Chatarina
