CNC sei estabelese muzeu memoriál munisipál Bobonaro
MALIANA, 02 maiu 2023 (TATOLI) – Sentru Nasionál Chega, Institutu Públiku (CNC,I.P sigla portugues) ho Autoridade Munisipiu Bobonaro (AMB) no entidade relevante sira diskute prosesu estabelesimentu muzeu memoriál munisipál ne’ebé tuir planu sei estabelese iha tinan ne’e.
Enkuantu muzeu memoriál ne’e atu disponibiliza no prezerva dokumentu istóriku sira kona-bá violasaun direitu umanu, hahú hosi períodu 1974-1999 no fasilita informasaun kona-bá istória pasadu ba publiku.
Nune’e mós sai sentru aprendizajen kona-bá pás, justisa no diireitu umanu, nu’udar referénsia istórika ba peskizadór sira no sai fatin ba reflesaun.
Diretór Peskiza no Arkivu Istóriku CNC, Benvindo Domngos José Guterres, esplika, tuir planu asaun anuál CNC nian, hahú hosi 2021 estabelese muzeu memoriál munisipál iha Covalima no Viqueuque no 2021 estabelese iha munisípiu Aileu.
Notísia relevante: Estabelesimentu sentru arkivu istóriku, CNC finaliza ona pagamentu ba konsultan
“Iha tinan ne’e ami hahú establese muzeu memoriál munisipál iha Bobonaro. Objetivu hosi muzeu ne’e oinsá mak atu halo prezervasaun ba memória istórika pasadu, liuliu oinsá atubele asegura portisipasaun ka involvimentu munisípiu ida-ne’e nia ba iha prosesu luta libertasaun nasionál atu nune’e istória sira-ne’e bele sai hanesan lisaun ba jerasaun foun,” nia informa ba jornalista sira, iha salaun administrasaun Bobonaro.
Ekipa CNC introdús konseitu muzeu memoriál munisipál ba autoridade munisípiu Bobonaro, konsellu veteranu, asaun vítima no entidades relevante sira hanesan Polísia Nasionál Timor-Leste (PNTL) no FALINTIL-Forsa Defeza Timor-leste (F-FDTL).
“Ha’u hanoin iha prosesu identifikasaun fatin estabelesimentu muzeu memoriál munisipál, iha rekomendasaun lubuk ida, kona-bá fatin istóriku balun. Ezemplu hanesan Kodim, Polres ne’ebé mak sira hato’o, ami CNC kontinua hein to’o desizaun ikus, orsida konselleiru sira mak halo aprosimasaun ho entidade relevante ba fatin sira-ne’ebé identifikadu ona hodi tau iha desizaun,” nia subliña.
Prezidente Autoriade Munisípiu Bobonaro, João de Fátima do Carmo, agradese ba CNC ne’ebé iha planu di’ak, tanba ho estabelesimentu muzeu memoriál munisipál bele prezerva ona istória pasadu hosi eroi no maátir sira.
“Ita munisípiu Bobonaro mós iha istória rasik, atu nune’e ita-nia jerasaun tuir mai bele hatene katak rai ida-ne’e ita ukun-aan liuhosi prosesu barak, ema barak terus, mate sai to’o ohin loron ohin ita goja Liberdade,” nia hateten.
Rezultadu no espetativa muzeu memoriál mak komunidade iha munisípiu Bobonaro bele asesu ona informasaun sira kona-bá istória pasadu, hahú hosi 1974-1999.
Notísia relevante: CNC diskute elaborasaun planu estratéjiku muzeu memoriál Covalima períodu 2023-2027
Jornalista : Sérgio da Cruz
Editór : Evaristo Soares Martins
