MANUFAHI, 02 maiu 2023 (TATOLI) – Partidu ho númeru sorteiu 12, Kongresu Nasionál Rekonstrusaun Timorense (CNRT-sigla portugés) iha nia kampaña ho tipu komísiu iha kampu futeból Same Vila, tersa ne’e, kontinua leventa kestaun dezentralizasaun no poder lokál, bainhira povu fó fiar.
“Ita sei implementa dezentralizasaun, iha Manufahi ne’e Governu lokál sei mosu iha ne’e, la’os atu hakbesik Governu ba povu”, Prezidente partidu Kay Rala Xanana Gusmão dehan iha nia intervensaun, tersa ne’e.
Nia dehan, bainhira hamosu ona Governu lokál iha Manufahi mak sei hili Manufahi oan mak lidera maibé tenke tuir méritu no iha kapasidade hatene halo servisu hotu.
“Ita mós sei iha parlamentu munisipál, hosi Turiscai nia deputadu sei mai tur iha munisípiu ne’e, hosi Fatuberliu, Alas no Same atu deputadu sira munisípiu nian bele haree preokupasaun povu nian hodi hakbesik Governu mai povu, ida ne’e importante mai ita atu halo iha tinan lima”, nia afirma.
Nia reforsa tan, bainhira mosu ona Governu lokál mak fasíl liu atu rezolve hotu preokupasaun povu nian liuliu iha área rurál sira.
Xanana husu ba povu hotu atu haree didiak hodi fó konfiansa ba CNRT atu realiza programa hirak ne’e hotu.
Bainhira povu fó konfiansa ba CNRT ho manán maioria absoluta mak prontu atu sai Primeiru-Ministru maibé la’os ba tur de’it maibé atu hadia buat hotu ne’ebé daudaun ne’e la’o laloos hela.
Kampaña partidu ho númeru sorteiu 12, hetan seguransa másimu hosi Polísia Nasionál Timor-Leste (PNTL) Munisípiu Manufahi, superviziona direta hosi Komisaun Nasionál Eleisaun (CNE-sigla portugés) no monitoriza hosi Provedoria Direitu Humanu no Justisa (PDHJ).
Jornalista: Hortencio Sanchez
Editór : Zezito Silva
