CNRT prefere dezenvolve makas setór ekonomia hosi baze
MANUFAHI, 02 maiu 2023 (TATOLI) – Prezidente Partidu Kongresu Nasionál Rekonstrusaun Timorense (CNRT-sigla portugés) Kay Rala Xanana Gusmão, fó prioridade hodi dezenvolve ekonomia hosi baze, tanba dezde independénsia povu iha área ruál seidauk sente ukun rasik-aan ho didiak.
“Loloos ne’e, CNRT kaer hosi 2017 mai, foku ona ba ekonomia atu sirkula ba área rurál, tanba dezde independénsia tinan 20 liuona maibé la dezenvolve-aan to’o iha área rural no povu sei la sente benefísiu hosi ukun aan”, Lider karismátiku Kay Rala Xanana Gusmão dehan iha kampaña ho tipu komísiu iha kampu futeból Same Vila, tersa ne’e.
Iha kampaña polítika ho númeru sorteiu 12, Xanana destaka setór importante sira hodi dezenvolve bainhira povu fó fiar, setór hirak ne’e mak agrikultura, pekuaria, peska no turizmu.
“Buat sira ne’e hotu mak ita ko’alia kona-ba agrikultura, pekuaria, peska, turizmu buat hotu ita mak tenke prodúz, iha Manufahi ne’e, Manufahi nia oan sira mak tenke hanoin atu halo hodi sirkula osan ne’e iha rai-laran”, nia dehan.
Nia akresenta, bainhira povu fó fiar ba CNRT ba kaer ukun iha tinan 2023-2028 mak sei dezenvolve makas iha setór ekonomia hodi hakbesik liutan ekonomia ba povu sira iha área rurál.
“Ida ne’e mak ita atu hala’o ba oin, tanba atu dezenvolve ekonomia ne’e, la presiza buat hotu mai hosi liur”, nia relata.
Kampaña partidu CNRT hetan seguransa másimu hosi Polísia Nasionál Timor-Leste (PNTL), Munisípiu Manufahi, superviziona direta hosi Komisaun Nasionál Eleisaun (CNE-sigla portugés) no observa hosi Provedoria Direitu Humanu no Justisa (PDHJ).
Tuir oráriu ne’ebé aprova hosi CNE, Partidu CNRT sei kampaña aban ha Munisípiu Dili.
Jornalista: Hortencio Sanchez
Editór : Zezito Silva
