VIQUEQUE, 02 maiu 2023 (TATOLI)—Governu liuhosi Ministériu Petróleu no Minerál (MPM) no Timor Gás no Petróleu, Empreza Públika (Timor GAP, E.P), tersa ne’e, enserra verifikasaun dadus rai no propriedade iha área dezignadu planta LNG iha Beaço, suku Maluro, postu administrativu Viqueque Villa, munisípiu Viqueque, ne’ebé hahú iha loron 02 fevereiru to’o 02 maiu 2023.
Atividade ne’e partisipa hosi Ministru Petróleu no Minerál, Victor da Conceição Soares, hamutuk ho Brigadeiru FALINTIL-Forsa Defeza Timor-Leste (F-FDTL), Sabika Besi Kulit, reprezentante Timor GAP, E.P, reprezentante Ministériu Justisa, Administradór munisípiu Viqueque, Januário Soares ‘Bolly’ inklui entidade relevante sira.
Ministru Petróleu no Minerál, Victor da Conceição Soares, agradese ba abitante, autoridade no veteranu afetadu ba kolaborasaun di’ak ho ekipa verikasaun durante prosesu verifikasaun loron-90.
“Ita enserra verifikasaun ida-ne’e, faze dahuluk halo negosiasaun ba rai iha Beaço hahú tinan 2020 to’o agora 2023, iha área dezignadu ne’e parsela identifikadu hamutuk 891, disputa rai entre komunidade 44 no parsela disputa 133 entre komunidade no Estadu, signifika parsela lubuk ida mak ita rezolve, ida-ne’e maka atubele garante projete LNG ho kondisaun kadoras tenke mai Timor-Leste tanba tuir negosiasaun ne’ebé la’o, Timor-Leste maka prepara kondisaun dada kadoras,” Ministru hateten hafoin atividade iha suku Maluro, Beaço.
Notísia relevante : Governu re-verifika ba rai-propriedade abitante afetadu projetu planta LNG iha Beaço
Ba oin Governu kontinua halo polítika hodi rezolve disputa no sei planu ba realokasaun abitante afetadu sira ba fatin dezignadu.
“Governu promete sei fó fatin dignu ba abitante sira hodi hela no sei kria fasilidade hanesan eletrisidade, bee-moos, eskola, kapela, estrada, inklui fasilidade saúde. Ida-ne’e ita-nia tékniku sira kontinua serbisu,” nia akresenta.
Aleinde ne’e, Governu sei indemniza uluk abitante molok muda ba fatin foun.
“Prosesu indemnizasaun agora maka foin konklui dadus verifikasaun no sei lori relatóriu dadus sira hafoin ita hatene kustu indemnizasaun,” Ministru tenik.
Iha fatin hanesan, Xefe suku Maluro, Francisco Amaral, relata, durante prosesu verifikasaun iha fulan-tolu, iha abitante afetadu balun maka la satisfaz no seidauk identifika uma balun.
“Ekipa téknika sira sei tun fila mai hodi halo identifikasaun. Ha’u hanoin ba oin Governu sei kria kondisaun di’ak ba ami. Ha’u nafatin rekomenda ba parte Governu hodi bele tun rezolve problema sira ne’ebé maka seidauk rezolve, liu-liu ba disputa rai sira-ne’e,” nia hato’o.
Bazeia ba dadus identifikadu rai no propriedade iha planta LNG, ho totál parsela identifikadu 891, totál parsela reklamasaun 64, parsela rezolvidu 34, parsela seidauk halo mediasaun 30, parsela Estadu reklama 133.
Dadus agrikultura no peska hanesan floresta 420, agrikultura 715, planta 488, pekuária 219, peska 75. Dadus obra públika iha uma identifikadu 640, dadus arte kultura iha rate, uma lisan no sítiu hamutuk 71.
Jornalista : Vitorino Lopes da Costa
Editora : Julia Chatarina
