iklan

EKONOMIA, HEADLINE

IGJ halo estimasaun sei hatama reseita millaun $5

IGJ halo estimasaun sei hatama reseita millaun $5

Inspetór Jerál Jogu, Domingos da Costa Guterres. Imajen/Tatoli

DILI, 02 maiu 2023 (TATOLI)—Ministériu Turizmu Komérsiu no Indústria (MTKI) liuhosi Inspesaun Jerál Jogu (IGJ, sigla portugés) halo estimasaun tinan ne’e sei hatama reseita millaun $5 ba kofre Estadu hosi jogu ilísitu no tradionál sira tanba iha trimestre dahuluk konsege hatama ona reseita millaun $1.

“Durante ha’u-nia mandatu, hahú hosi tinan 2020 to’o agora hatama reseita ba kofre Estadu hamutuk $1.274.051,47, ba tinan 2021 nian rekolla $1.691.615,47, tinan 2022 rekolla $3.124.874,63. Ba 2023 trimestre dahuluk hahú hosi janeiru to’o marsu ita rekolla ona $1.090.499,91,” Inspetór Jerál Jogu, Domingos da Costa Guterres, informa ba Agência Tatoli liuhosi programa entrevista eskluziva iha estúdiu Farol, foin lalais ne’e.

 Notísia relevante : IGJ apreende jogu bola guling ilegál hitu durante fulan-haat

Reseita sira ne’ebé rekolla hosi jogu sira ne’ebé IGJ rejista hanesan lotaria hamutuk neen, slot machine tolu, toto bola tolu no jogu tradisionál hamutuk 13.

“Hosi jogu sira ne’e tuir dadus ne’ebé ita akapta, reseita barak maihosi slot machine, lotaria, jogu tradisionál ka bola guling no ikus mak toto bola,” nia akresenta.

Rekezitu ne’ebé fó atu loke bola guling maka tenke iha fatin seguru, iha kartaun Eleitorál ka Billete Identidade (KI) inklui iha kartaun vasina nian.

“Empreza sira loke bola guling tenke iha tempu kalan, hahú tuku 21:00 ba leten, ne’ebé ho kondisaun labarik kiik-oan sira labele partisipa no tenke dook hosi eskola no igreja. Antes sira atu loke, sira tenke mai rejistu, ita fó durasaun fulan-ida. Selu iha nasionál no munisípiu la hanesan, ba nasionál kada kalan ida $100, enkuantu munisípiu kalan ida $50, entaun antes sira atu loke tenke selu kotu tiha mak foin loke,” nia informa.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!