DILI, 02 maiu 2023 (TATOLI) – Ministériu Edukasaun, Juventude no Desportu (MEJD) seidauk kria sala própria ba biblioteka, maibé foku liubá estabelesimentu sala de aula ba eskola sira tanba seidauk sufisiente.
“Ami tau prioridade ba konstroi no reabilita sala de aula iha eskola sira, tanba durante ne’e eskola 1.800 halerik de’it ba edifísiu no sala de aula, nune’e maka ministériu kria planu hodi konstroi”, Diretór-Jerál Administrasaun no Finansa MEJD, Antoninho Pires, dehan ba Tatoli, iha Vila Verde, tersa ne’e.
Nia dehan ministériu sei tau prioridade atu kria sala própria ba biblioteka eskolár, se kondisaun sala de aula iha eskola sira permite ona maka foin haree filafali ba nesesidade sira seluk.
“Ida maka sala própria ba biblioteka ne’e rasik, tanba sala de aula agora la sufisiente. Ha’u hakarak dehan iha dezenvolvimentu eskolár ne’e iha komponente lima maka konsagra ona, ida maka biblioteka eskolár iha kada eskola sira depois sala de aula, edifísiu atu apoiu prosesu ensinu aprendizajen, sanitasaun inklui merenda eskolár no resintu eskolár. Biblioteka eskolár ne’e programa Governu nian, ne’e duni apoiu hosi parseiru sira ne’e tenke simu”, nia salienta.
Dirijente ne’e realsa kona-ba biblioteka eskolár ida maka tenke iha livru adekuadu atubele tau iha fatin sira ne’e hodi tulun profesór no estudante sira ba sira-nia nesesidade. “Livru sira ne’ebé maka ministériu apoia ba eskola sira ne’e iha oin rua. Ida mak manuál eskolár ba profesór no alunu. Daudaun ministériu konsege apoia ona kuaze millaun tolu ba alunu sira”, relata.
Nia dehan iha territóriu eziste eskola besik 1.800 no kada estabelesimentu ne’e tenke iha biblioteka eskolár rasik, maibé tanba haree ba kondisaun iha eskola sira, entaun prezensa biblioteka nian iha sala ida nia laran, maibé kuandu laiha liu ona bele prepara espasu ki’ik ida iha aula laran hodi tau livru sira ne’e.
“Loloos ne’e tenke iha duni sala própria, nune’e ekipa ida bele halo jestaun di’ak ba livru sira ne’e, maibé ekipa ne’ebé jere laloos profesór tenke ema ne’ebé serbisu iha biblioteka ne’e rasik”, nia afirma.
Tanba Ministériu Edukasaun seidauk kria sala própria ba biblioteka escolar maka dirijente ne’e husu ba eskola sira iha territóriu ne’ebé maka simu ona livru atubele kontinua jere ho didi’ak hodi fasilita profesór no estudante sira asesu tuir duni nesesidade ne’ebé iha.
Jornalista: Tomé Amado
Editora: Maria Auxiliadora
