DILI, 02 maiu 2023 (TATOLI)—Segundu Vise Prezidente Parlamentu Nasionál, Luis Roberto hateten, tersa ne’e, iha Parlamentu Nasionál labele realiza reuniaun plenária tanba korum funsionamentu la prienxe.
“Ohin, loron 02 maiu ne’e, funsionamentu plenária nian tuir rejimentu iha segunda-tersa halo plenária baibain, maibé horisehikk hanesan loron mundiál ba traballadór sira nian, entaun ohin mak komesa fali plenária. Maibé, ita-nia korum funsionamentu laiha ka la prienxe, entaun ha’u deklara ensera tiha,” Vise Prezidente Parlamentu Nasionál ne’e hateten ba jornalista sira iha uma fukun PN.
Nia hatutan, tanba korum funsionamentu tuir rejimentu presiza Deputadu prezente iha na’in-23 ba leten maibé marka de’it Deputadu na’in-18 hanesan ne’e, depois balun sai tan tiha númeru tun tan, nune’e deklara hodi ensera plenária labele realiza hodi adia fali ba semana oin.
“Bankada sira-ne’ebé maiória la marka prezensa mak CNRT, PD, iha PUDD, UDT depois Frente Mundansa inklui bankada plataforma sira-ne’ebé balun la marka prezensa, ne’ebé karik bankada plataforma tolu marka hotu mós korum funsionamentu la’o,” nia dehan.
Deputadu Luis Roberto hateten, ho auzénsia Deputadu sira-nian ne’e kontra rejimentu no iha prosesu maibé daudaun Timor-Leste tama hela tinan polítika no hala’o hela kampaña eleitorál ba eleisaun parlamentár.
“Tuir loloos ita hanesan Deputadu mandatu seidauk ramata labele abandona ita-nia serbisu ka responsabilidade nu’udar Deputadu. Ha’u fiar partidu polítiku hotu nia ema tun atu ba halo kampaña, maibé karik fora hosi ajenda ita bele akompaña. Kuandu ita deklara tiha ona, ita aprova tiha ona rezolusaun ida iha Parlamentu katak, iha segunda no tersa ita iha plenária entaun sira tenke hatene sira-nia papél,” nia dehan.
Tanba ne’e, nia dehan, ida-ne’e hatudu imajen funsionamentu PN nian ladun di’ak, nune’e labele diskute ajenda reuniaun plenária ne’ebé marka ona.
Nune’e, nia husu Deputadu sira atu marka prezensa iha semana oin hodi bele funsiona nafatin reuniaun plenária.
Entertantu, tuir ajenda ne’ebé Ajénsia TATOLI asesu reuniaun plenária tersa ne’e, atu trata ajenda hanesan períodu antes orden do dia iha asuntu lubun ida no períodu orden do dia mak hanesan anunsia admisaun no baixa ba komisaun C trata asuntu Finansa Públika ho komisaun espesializada permanente sira seluk kona-ba proposta-lei númeru 57/V(5a) Grande Opsaun Planu (GOP) ba 2024, ho inisiativa lejislativa seluk inklui atu aprova no diskute rezolusaun importante tolu, tambá ne’e labele realiza reuniaun plenária hodi adia ba semana oin.
Jornalista : Nelson de Sousa
Editór : Cancio Ximenes
