OÉ-CUSSE 02 maiu 2023 (TATOLI) – Partidu Dezenvolvimentu Nasionál (PDN), promete bainhira povu depozita votu konfiansa hodi hetan asentu parlamentár, sei defende família mártir pátria hodi hetan moris di’ak, no hasa’e sálariu ba konsellu suku.
Prezidente Partidu PDN, Lucas Soares Colibere, husu atu vota ba partidu PDN ho númeru sorteiu 1 iha loron 21 fulan maiu, tanba PDN mai ho programa rasik atu tau matan ba jerasaun mártir no kombatente libertasaun nasionál.
Prezidente Partidu PDN, Lucas Soares Colibere, hato’o kompromisu polítika ne’e hafoin hala’o diálogu eleitorál ho eleitór sira iha aldeia Oésono, suku Costa sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA), tersa ne’e.
“Ita-nia prioridade liu maka maluk sira-ne’ebé mate iha masakre Tumin, ema oho tanba ukun-aan, Governu tenke tau matan ba sira-nia família, tanba sira mate defende Timor atu ukun rasik-aan, durante ne’e deputadu ida nunka ko’alia kona-bá sira-ne’ebé mate iha masakre Tumin, masakre Liquiçá, Suai, masakre Crararas, no Jakarta I no II, tán ne’e PDN prepara programa ida ba ida-ne’e,” Lucas Colibere, ko’alia iha Oé-Cusse.
Nia prefere Governu tenke tau matan ba família mártir pátria liuliu oan sira tenke hetan tratamentu di’ak, asesu edukasaun ho dignu, tanba sira fó ona vida atu fakar-raan, maibé ikus mai ema seluk mak moris di’ak.
“Governu tenke trata sira-nia uma hela fatin, tanba ne’e prioridade ba PDN bainhira ukun ida-ne’e tenke rezolve,” nia promete.
Nune’e mós ba veteranu no kombatente nia oan karik la eskola, buka meiu Estadu tenke tau osan, tanba sira-nia aman, mak Timor-Leste ukun rasik-aan, tanba ne’e oan sira hosi veteranu no mártir sira tenke hetan edukasaun di’ak, rekruta profesór espesiál atu hanorin família mártir pátria nian, tán ne’e tenke fó prioridade no fó previleiju ba sira.
PDN mós iha programa prioridade seluk, karik povu fó fiar ba Partidu PDN atu ukun, sei fasilita mós subsídiu ba autoridade komunitária, juis no prokuradór sira hodi mellora atendimentu públiku ho di’ak.
“Xefe suku ho xefe aldeia no konsellu suku sira, tenke fó sálariu másimu ho dignu, tanba sira loron-loron moris ho povu, sira mak hatene, dadus populasaun, kona-bá kiak, la eskola iha suku na’in-hira, sira-ne’ebé la servisu, hakarak kontinua eskola, atividade saida de’it mak hala’o iha suku, sira mak lidera suku, ida-ne’e tenke fó atensaun,” nia katak.
Tuir nia, agora saláriu ba xefe suku kada fulan hetan $250.00, sé salariu hanesan, nia bele rezolve problema komunidade iha suku ne’e oinsá, dala barak akontese problema rai, problema arte-marsiál, xefe suku nia responsabiliza, tán ne’e saláriu ba líder komunitáriu tenke sa’e, ida-ne’e PDN ajenda iha programa bainhira hetan fiar hosi povu atu ukun ka hetan asentu iha parlamentár sei defende ida-ne’e.
Nune’e mós bainhira PDN hetan asentu parlamentár, sei defende mós direitu ba orgaun judisiáriu, saláriu ba juiz no prokuradór no defensór públiku tenke dignu, atu sira bele rezolve problema korrupsaun iha Timor-Leste.
“Tanba problema balu akontese tiha entrega ona ba iha parte justisa, maibé to’o mate de’it mós justisa laiha kazu barak la hotu, tanba saláriu ba juis ho prokuradór sira-nian mínimu liu, entaun prontu nia labele konsentra ba justisa, entaun justisa falla buat hotu falla,” nia hateten.
Jornalista: Abílio Elo Nini
Editór: Evaristo Soares Martins
