iklan

DILI, POLÍTIKA

PN husu EDTL, E.P hadi’a sistema atendimentu iha estabelesimentu faan pulsa

PN husu EDTL, E.P hadi’a sistema atendimentu iha estabelesimentu faan pulsa

Kliente sira forma nadodon iha sentru estabelesimentu faan pulsa eletrisidade nian. Imajen/Espesiál.

DILI, 02 maiu 2023 (TATOLI)—Vise Prezidente Parlamentu Nasionál, Luis Roberto, husu ba Eletrisidade de Timor-Leste Empreza Públika (EDTL, E.P) atu hadi’a sistema atendimentu iha sentru estabelesimentu faan pulsa eletrisidade nian.

“Jestaun sira ita tenke hadi’a liu-liu loja atu faan pulsa, sira kria bara-barak iha Dili laran maibé dala ruma nia sistema la’o lentu. Entaun, ita-nia komunidade kalan boot forma iha ne’ebá depois to’o dalan klaran sistema error nafatin,” Vise Prezidente PN ne’e hateten ba jornalista sira iha PN, tersa ne’e.

Nia dehan, ida -ne’e ema bele dada ahi liu hosi dalan ilegál, kauza mak depois aplika fali lei balun selu multa no tesi kotu ligasaun.

“Maibé, jestaun ne’ebé sira kria ne’e dalaruma ladi’ak ne’ebé Parlamentu husu ba Governu halo óinsá mak bele hadi’a jestaun ne’e atu nune’e labele halo ita-nia komunidade sai nafatin vítima,” nia hateten.

Enkuantu, tuir informasaun ne’e Agência TATOLI asesu hosi pajina EDTL ohin katak informasaun sistema faan no sosa pulsa eletrisidade atu informa ba kliente no públiku ho pontu sira hanesan;

Ita-nia sistema venda enerjia ne’e liu ona tinan 10 no sentru venda liu 400 mak asesu, todan atu opera.

EDTL ho TIC Timor halo exersísiu depois detekta mós katak iha ema entra iha sistema ou hack entaun halo sistema opera la normál.

Tanba ne’e asaun mak halo EDTL hetan apoiu tékniku hosi ADB no Itron hanesan sistema nain halo hela manutensaun no espera sei ajuda bele normaliza fali.

Deside uza VPN hodi taka ba públiku no labele ataka hosi hacker sira, tanba ne’e limita sentru venda hodi asegura nafatin faan pulsa.

CNA konklui ona prosesu konkursu no hetan ona manan nain hodi halo upgrade ba sistema ne’e rasik, sira sei hlo post kualifikasaun depois asina kontratu hafoin upgrade.

Hakarak informa mós ba kliente sira katak ba sira-ne’ebé pulsa sei iha la presiza hotu-hotu hola pulsa iha loron ida kada fulan, tanba bonus ne’ebé EDTL oferese sei lalakon, sei hetan iha primeiru kompra iha kada fulan, atu sosa fali iha dia 3, 10, 15, 25 ou seluk mós sei hetan bonus nafatin.

Atu nune’e, husik ba sira-ne’ebé pulsa laiha mak bele sosa iha loron ida, atu nune’e ajuda labele hatodan sistema.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!