DILI, 02 maiu 2023 (TATOLI)—Prezidente Repúblika (PR), José Ramos Horta, husu atleta timoroan atu hatudu dixiplina hodi hamorin Estadu Timor-Leste nia naran iha jogu Sea Games tinan ne’e iha Kambódia.
TSekretáriu Jerál Komité Olímpiku Nasionál Timor-Leste (CONJTL, siglá portugés), Laurentino Guterres, hateten objetivu enkontru ho Prezidente Repúblika atu mai kumprimenta Prezidente Repúblika no ofisialmente óinsa PR bele husik kontijente Timor-Leste atu ba partisipa Sea Games iha Kambódia fulan-maiu ne’e.
“Prezidente Repúblika nia mensajen ba kontijente tomak oinsá bele dixiplina lori ita-nia nasaun no lori Estadu nia naran hamorin iha Sea Games. Manán ka lakon, oinsá mak ita lori Timor-Leste nia naran ho di’ak bele hamorin Timor nia naran la’ós tanba medalla maibé pelumenus hatudu ita-nia atitude di’ak nu’udar embaixadór iha Sea Games Kambódia,” Sekretáriu Jerál CONJTL ne’e hateten ba jornalista sira hafoin ramata enkontru ho Xefe Estadu iha Palásiu Prezidensiál Nicolau Lobato, Bairru Pite, tersa ne’e.
Nia dehan, totál delegasaun hamutuk ema na’in-103 mai hosi modalidade 12 no iha feto kuaze na’in-15 no restu mane, atleta ho ofisiál kuaze 90 mak sei aranka ba Kambódia.
“Ha’u hanoin iha esperiénsia tinan kotuk ita-nia modalidade sira purezsmplu hanesan boxe, atletizmu, taekwondo ita iha di’ak. Maibé ita mós tuir kondisaun agora ita mós labele obrigada ita-nia atleta sira tenke lori medalla, tanba ita-nia kondisaun preparasaun durante ne’e klaru ho orsamentu ne’ebé mínimu, ita halo preparasaun másimu ona ba sira. Maibé, ita-nia kondisaun reál ita bele mós tenke onestu,” nia hateten.
Nia dehan, orsamentu deslokasaun kuaze $147.000 no kada loron ida kada atleta simu $49.
Prezidente Konferedasaun Desportu Timor-Leste (CDTL, siglá portugés), Macario Floriano Sanches, hateten Governu liuhosi Sekretária Estadu Juventude no Desportu (SEJD) hetan aloka orsamentu rihun $82 no hosi kondisaun reál orsamentu mak ne’e ba hahan iha rihun $49 hodi fahe ba atleta tomak.
“Ita liuhosi prosesu ida sistema aprovizionamentu ita hetan kompañia mak fornese hosi ema ida hetan másimu liu $18, 70 sentavus hanesan ne’e ba loron ida tomak,” nia dehan.
Jornalista : Nelson de Sousa
Editór : Cancio Ximenes
