ERMERA, 02 maiu 2023 (TATOLI) – Partido Socialista de Timor (PST) kompromete sei fó ‘Subsídiu Agrikultura’ no ‘Estabelese Sentru Kafé iha Glenu, hodi hadi’a povu kafekultór sira-nia moris.
“Ohin, PST realiza dialógu komunitária ho komunidade aldeia Aitura, Suku Estadu, hodi hato’o programa prinsipál PST nian. Suku Estadu ne’e iha rai, no rai povu nian, katak subsídiu ba agikultór sira ne’e atu halo munisípiu Ermera no Likisa sai sentru indústria ba produsaun kafé hodi haruka ba merkadu rejionál no internasionál,” Prezidente PST, Avelino Maria Coelho ba Tatoli via telefone, tersa ne’e.
Iha kapaña dialógu komunitária ne’e, líder másimu PST ne’e mós kompromete sei fó apoiu ba kafekultór ho ekipamentu dulas kafé modern, hanesan troka mákina dulas kafé manual ho mákina enérjia solar hodi hadi’a kulaidade kafé: “Apoiu mákina ne’e para kafekultór sira bele prosesa kafé kulit mean ba kulit mutin, depois mak kafé musan transporta ba Glenu hodi tama iha prosesamentu ba kafé-ut.”
Avelino reiteira katak tanba governu sei subsídia kafekultór sira hodi kuda kafé, ho nune’e maka produtu kafé sei sai produtu industrial ba Ermera no Liquiça: “Ba povu Ermera, produtu kafé sai hanesan produtu industrial, entaun ho subsídiu agrikultura bele dezenvolve sira-nia rai agrikultura sai agrikultura ida komersiál.”
“Portantu, governu subsídia ona agrikultura, entaun povu mós bele kuda tán ai-horis seluk. Pur ezemplu, ai-nanas no ai-fuan seluk para bele lori ba Aileu tanba Aileu tuir PST nia projeisaun sei sai munisípiu ne’ebé mak sai indústria ba bebida kalen,” Líder ne’e akresenta.
Iha sorin seluk, PST mós hato’o ninia program kombate desempregu liu husi dezenvolve seitór agrikultura.
“Atu rezolve dezempregu la’ós lori joven Timoroan sira ba rai liur, maibé estadu tenke subsídia agrikultura nu’udar setór ne’ebé mak bele kria kampu traballu ba ita-nia joven sira ne’ebé mak maioria povu agrikultór nia oan,” nia hatutan.
Nia salienta katak se haruka hotu joven sira ba rai liur neneik mão de obra joven laiha, no inan aman sira sei laiha forsa atu transofrma agrikultura sub-sisténsia ba modernu.
PST mós kompromete hodi hadi’a Estrada rurais ne’ebé mak sei abandona no sedauk hetan atensaun.
“Se karik PST liu bareira ou hetan fiar ba ka’er ukun, ita bele haree oinsá atu rezolve problema Estrada povu nian ba area rurais,” tenik Avelino.
Komunidade besik 300 resin husi Aldeia Aitura, Suku Estadu, Postu Administrativu Ermera, Munisípiu Ermera mak marka prezensa iha kampaña dialógu komunitáriu ne’e.
Entertantu, iha lorin 19 abril, 2023, PST lansa iha Munisípiu Ermera, programa prinsipál 10 kampaña eleitorál hodi komepete iha Eleisaun Parlamentár loron 21 maiu, tinan ne’e.
Programa hirak ne’e mak hanesan: ‘Repozisaun Ordem Demokrátika Konstitusional Defeza Konstituisaun-RDTL Nu’udar Baze ba Respeitu Direitu Sidadaun sira nian; Defende Rai Povu Nian bazeia ba Uma Knua, Tuir Lisan Timor-Leste; Garante Subsídiu ba Agrikultór no Harii Fundu ba Agrikultór; Kria Industrializasaun Setór Agrikultura; Kria Asaun ba Traballadór sira; Garante Ensinu Superiór Gratuitu, Protesaun ba Komersiante Ambulante, no Kria Zonamentu Komérsiu iha Dili laran hodi defende Direitu Komersiante Ki’ik Sira, Produsaun Lei ho Karaktéristika Timor-Leste Nian no Revizaun Kuadru Juridíku Nasionál, no Kria Modelu Ekonómiku no Investimentu Assente iha Partisipasaun Setór Kooperativa Knua Setór Públiku no Privadu.
Jornalista: Filomeno Martins
Editora: Nelia Borges
