LOSPALOS, 02 maiu 2023 ( TATOLI)- Diretór Servisu Saúde Munisípiu Lautem( SSML),Anastacio da Cruz, hateten SSML durante ne,e hasoru difíkuldade barak kona-ba menus fasilidade saúde no rekursu umanu hodi fó atendimentu ba pasiénte sira ho lalais no efikásia.
Durante intervista ho Jornalista Ajensia Tatoli, Diretór ne’e informa, fasilidade ne’ebé menus maka hanesan aimoruk antibióitiku, kanula, inklui mós menus transporte multi funsaun, no manutensaun no konstrusaun ba sentru saúde sira iha Munisípiu Lautém.
“Hosi postu saúde 32 no sentru saúde lima ne’e, maioria kondisaun ladun di’ak no presiza halo manutensaun, nune’e sentru saúde refere iha de’it kareta saúde multifunsaun ne’en, tanba ne’e difikulta tebes hodi ba tula moras emrejénsia sira ihaMunisípiu Lautém laran tomak ho efikasia hodi lori mai iha sentru saúde sira atu hetan tramentu ho lalais,”
Liga ba rekursu umanu, nia hateten SSML sei menu doutór hodi fó atendimentu saúde ba Komunidade sira.
“Ita iha doutór jerál hamutuk 40, infremeiru no parteira hamutuk 100 resin no laiha doutór espesialiasta, tanba ne’e bainhira iha moras komplikadu ruma rekomanda ba ospitál referál Bacau hodi bele fó atendimentu ba ita-nia pasiente sira ho lalais hodi bele salva sira-nia vida,” nia subliña.
Maibé Diretór ne’e reafirma katak, difikuldade sira ne’ebé maka saúde munisípiu Lautém enfrenta, nia parte hato’o ona Governu liu hosi Ministériu Saúde, maibé seidauk hetan resposta tanba razaun limitasaun iha orsamentu.
“Maibé fi’ar katak governu foun sei rezolve difikuldade no lamentasaun hirak ne,e iha 2024 ba leten hodi mellora kualidade saúde ba sidadaun hotu iha Timor – Leste,” nia hateten.
Entretantu Munisípiu Lautém rejista postu saúde hamutuk 32 ne,ebé harii iha kada suku no sentru saúde lima ihaPostu Adminstrativu, kompustu hosi sentru saúde Iliomar, Luro, Tutuala, Lautem no sentru saúde Lospalos. Hosi postu sira ne’e, Postu Adminstrativu Lore mak sedauk instala Postu Saúde foun tanba, Governu foin implementa statuta Lore sai hanesan Posto Adminstrativu da neen no foun iha Munisípiu Lautém.
Jornalista: Camilio de Sousa
Editora: Nelia Borges
