DILI, 02 maiu 2023 (TATOLI) – Pontu fokál Sentru Nasionál Formasaun Profisionál (SNFP) Becora, Fernando Carvalho de Araújo, informa sentru daudaun ne’e forma hela joven 320-resin iha área oioin ne’ebé atividade ne’e komesa husi nivel I, II to’o III.
Fernando Carvalho esplika katak nivel I ne’e hahú husi baze mak kontinua ba II ne’ebé mak foka ba área ida-idak no nivel tuirmai mak atu hasa’e abilidade.
“Tinan ida ne’e ami limita tiha númeru tanba antes ne’e ema barak tebes no sentru ne’e sei iha limitasaun ba sala aula, ne’e duni ita simu de’it estudante hamutuk 320-resin. Hosi númeru ne’e ami fahe ba dadeer no loraik”, pontu fokál hatete ba Tatoli, iha Becora, tersa ne’e.
Nia mós relata katak maske sentru ne’e nia na’in mak Estadu no harii kleur ona, maibé foin maka iha planu atu kria baze dadus hodi bele akumula totál formandu sira ne’ebé akaba ona sira-nia formasaun iha sentru, nune’e bele hatene na’in hira mak hetan ona serbisu no hira maka seidauk.
Sentru formasaun ne’e iha área hamutuk 11 ne’ebé konsidera pertinente duni ba futuru atu loke oportunidade ba formandu sira kompete iha merkadu traballu. Área sira ne’e maka hanesan formasaun ba hadi’ak ar conditionado (AC), soldadura, panifikasaun halo dose no tunu paun, teknolojia informátika (IT), informátika bázika, karpintaria, eletrisidade, automovel no pedreiru.
Sentru ne’e kada tinan sempre hetan apoiu orsamentu hosi Estadu no halo mós kooperasaun ho nasaun sira hanesan Brazíl atu apoia formasaun ida ho kualidade ba timoran sira, ho Universidade Kupang hodi fó formasaun téknika ba formadór sira, ho KOICA ba apoiu formasaun lingua ba estudante sira. Aleinde ne’e serbisu hamutuk ho FALINTIL-Forsa Defeza Timor-Leste (F-FDTL) no sei iha tan planu atu koopera ho Polísia Nasionál Timor-Leste (PNTL).
Fernando Carvalho relata katak husi totál formandu ne’ebé partisipa formasaun iha estudante finalista na’in-30 hosi Universidade da Paz (UNPAZ) ne’ebé aprofunda hela sira-nia abilidade téknika hodi prepara-aan atu kompete iha merkadu traballu.
“Ita haree daudaun ne’e, bazeia ba nesesidade merkadu ne’ebé obriga ita-nia joven sira ne’ebé barak liu remata lisensiatura de’it maka agora tuir hela formasaun iha SNFP,” dehan.
Fernando Carvalho afirma katak depois estudante lisensiatura sira ne’e hetan ona formasaun, nia halo konfirmasaun ho kada pesoál sira no konfesa katak ho diploma lisensiatura de’it ne’e la to’o, ne’e duni sira hakarak hasa’e tan abilidade atu tulun sira iha futuru bele kompete iha merkadu traballu.
“Tanba ohin loron mundu tama ona iha era globalizasaun no kompetisaun iha merkadu maka’as liu, ne’ebé iha Timor-Leste mós presiza ema ne’ebé iha kapasidade adekuada atubele tama iha merkadu traballu. Se ida ne’e maka laiha, ema ida labele halo buat ida”, realsa.
Jornalista: Tomé Amado
Editora: Maria Auxiliadora
