DILI, 02 maiu 2023 (TATOLI)–Xefe Estadu-Maiór Jenerál FALINTIL-Forsa Defeza Timor-Leste, Tenente Jenerál Falur Rate Laek, hetan fotografia ne’ebé espalla iha mídia katak, eis militár balun utiliza atributu militár iha ámbitu kampaña eleitorál ba Eleisaun Parlamentár 2023.
“Ema ida seidauk halo keixa mai ha’u maibé ha’u hetan hosi mídia, ne’ebé ha’u haruka ona karta ba Komisaun Nasionál Eleisaun (CNE, sigla portugés) hodi foti medida. Tanba atributu militár la’ós atu uza fali iha partidu maibé líder istóriku ne’e buat seluk ida maibé baino oan sira ikus ne’e mak lalin ba ne’e tenke prosesa tanba atributu militár kuandu sei ativu mak uza maibé ba ona polítika uza uniforme partidu nian,” Tenente Jenerál hateten iha Kuartel Jenerál F-FDTL, Fatuhada, tersa ne’e.
Notísia relevante : Lei Bandu Uza Atributu Rezisténsia Ba Interese Partidu
Bazeia ba relatóriu CNE nian, pesoál balun ne’ebé la’ós ona membru ativu militár, utiliza nafatin sira-nia fotografia militár hodi hatudu iha ámbitu kampaña eleitorál.
Liga ho pesoál militár sira ne’ebé daudaun fó seguransa ba líder partidu polítiku no utiliza mós atributu partidu nian, Tenente Jenerál dehan Komandu ninia diretiva klaru katak membru sira-nia dever mak atu fó seguransa ba entidade a’as sira, la’ós viola regra.
“Ha’u hasai diretiva ba sira la’ós tenke utiliza fali partidu nia atributu maibé ha’u komanda militár sira uza sivíl, entaun husu ba partidu, tanba ha’u laiha uniforme partidu nian. Kuandu keixa mai ona ami halo prosesu disiplinár hodi kastigu tuir estatutu militár no todan liu duni sai hosi vida militár hodi ba vida sivíl,” nia tenik.
Eis militár sira ne’e maka hanesan pesoál ne’ebé husu rekerimentu hodi sai hosi forsa hodi ba vida sivíl.
Biban hanesan, Komandante Jerál PNTL, Komisáriu Jerál Henrique da Costa, realsa Konstituisaun RDTL hatur klaru kata membru sira hala’o misaun bazeia de’it ba lei.
“Komandu laiha orientasaun atu membru ida ba halo seguransa ba alta entidade sira hodi uza fali atributu partidu ida nian, kuandu iha komandu prosesa tanba ita-nia Konstutuisaun RDTL, artigu 147 klaru kedas ona katak Polísia hala’o ninia kna’ar independente no non partidária, signifika ita la mete partidu polítiku,” nia klarifika.
Nune’e, tanba kestaun espesífiku seguransa nian, Komandu labele publika membru hirak ne’ebé fó seguransa ba alta entidade sira iha ámbitu kampaña eleitorál.
Jornalista : Antónia Gusmão
Editora : Julia Chatarina
