AILEU, 02 abríl 2023 (TATOLI) – Fatin turizmu komunitáriu ne’ebé konstrui hosi Grupu komuninataria Seloi Haut- Anan hanesan Laletek Talifurleu ne’ebé lokaliza iha Suku Seloi Kraik, Postu Administrativu Aileu Vila, Munisipiu Aileu, loron ida hetan redimentu $20.
“Fatin turizmu komunitáriu iha Suku Seloi Kraik ne’e iha fatin ualu, maibé vizitante sira barak liu ne’e vizita mak iha fatin Laletek Talifurleu no Domin Furak Seloi. Ida Laletek Talifurleu ne’e loron ida bele hatama rendimentu $20”, Responsavél turizmu komunitáriu Laletek Talifurleu iha Seloi Francisco Dias hateten ba jornalista TATOLI, tersa ne’e.
Nia esplika, tuirzmu komunitáriu iha Suku Seloi konstrui iha fatin ne’ebé hanesan, kompostu hosi, Laletek Talifurleu, Domin Furak Seloi. Fatin hirak ne’e iha mós ponte ne’ebé fasilita vizitante hakarak hasai foti haree paizajen Seloi nian iha fatin ne’e, iha mós fatin ba hakail trádisionál atu kail ikan halimar no iha mós fatin ba vizitante atu kail, iha mós fatin ba deskansa hosi vizitante sira, bainhira vizita sira halo viajen mai Seloi, iha mós fatin Kemping hodi fó oportunidade ba vizitante sira, iha mós fatin rental bisikleta.
“Fatin turizmu komuntáriu iha Seloi ne’e iha grupu ualu (8) mak toma konta sai hanesan jerente hodi jere no kontrola fatin turizmu komunitáriu ne’e, ida Laletek Talifurleu, ha’u rasik ho kolega nain ualu mak tau matan ba fatin turizmu komunitária ne’e”, Responsavél Laletek Talifurleu Francisco dias informa.
Nia hateten, fatin turizmu komunitáriu Laletek Talifurleu ne’e ba visitante sé de’it atu tama vizita maibé tenke selu ho presu dolar ida mak foin hodi hasai foto iha fatin ne’e, sé lae la permite sira atu vizita.
Responsavél turizmu komunitáriu Laletek Talifurleu ne’e agradese ba Governu, tanba bele hili Suku Seloi hanesan pilotu ba estabesimentu turizmu komunitáriu iha Timor-Leste.
“Agradese ba VIII Governu tanba bele foti moós Suku Seloi ne’e hanesan pilotu ida ba ami joven sira iha ne’e, Ba oin husu Governu atu kontinua identifika fatin poténsia iha Seloi hodi tranforma sai fatin turizmu komunitáriu, tanba Seloi ne’e iha fatin barak mak sai hanesan poténsia ba turizmu”, Francisco dias agradese.
Nia mós enkoraza ba joven sira atu lalika baruk, lalika halimar mak barak maibé tenke kontribui ba prosesu tomak.
“Ita joven ida agora tenke badinas hatudu kretividade hodi kria buat ne’ebé mak ita joven iha tuir ita-nia kbi’it, maske atu hetan osan barak ka oituan hosi Governu, maibé ita tenke hatudu naftin hodi ita joven mós bele konstribui ba prosesu dezenvolvimentu nasionál ne’ebé agora la’o”, Francisco Dias hateten.
Estabelesimentu Tuirzmu Komunitáriu iha Suku Seloi Kraik, konstrui iha loron 12 novembru 2021, ho finansiamentu mai hosi Ministériu Turizmu Komérsiu Indústria (MTKI) ho montante $49.000-resin no inagura direta hosi Ministériu Turizmu Komérsiu Indústria iha inisiu tinan 2023 .
Jornalista: Natalino Costa
Editór : Zezito Silva
