AILEU, 02 abríl 2023 (TATOLI) – Vise Ministru Administrasaun Estatal (VMAE) Lino de Jesus Torazão, fó posse ba Felis Maria de Oliveira sai Sekretária Munisipál Aileu ba mandatu tinan lima.
Felis Maria de Oliveira selesionadu ba Sekretariá Munisipál Aileu hafoin tuir tiha teste ho méritu iha ba vaga ne’ebé fó sai iha Komisaun Funsaun Públika.
Liuhosi despaixu Komisaun Funsaun Públiku númeru 5480/2023/ CFP, deside Felis Maria de Oliveira selesiona ho méritu ba vaga ida ne’e hodi sai hanesan Sekretária Munisipál.
Hafoin serimonia pose ba Sekretária Munisipál, Vise Ministru Administrasaun Estatal husu ba emposadu atu halo servisu tuir lei ne’ebé atribui ba Sekretáriu Munisipal liuliu kolabora ho Administradór Munisipál nudar dirijente másimu iha Administrasaun Munisipál ka Prezidente Autoridade Munisipál hodi bele garante funsiomentu Administrasaun Munisipál.
“Durante mandate, tau iha neon katak ita boot bele tulun Administradór Munisipál hodi halao nia funsaun hodi kumpre desizaun Governu nian ne’ebé refere ona iha Dekretu-Lei númeru 3/2016 kona-ba prinsípiu legalidade, imparsialidade no servi ba interese públiku no administrasaun ba deskonsentrasaun administrativa ne’ebé mak haree liuba igualdade, proporsionalidade, justisa, impasialidade, responsablidade, koerénsia no efisiénsia”, Lino de Jesus Torazão hateten iha nia intervensaun iha ámbitu fó posse ba Sekretária Munisipal Aileu, Felis Maria iha Administrasaun, tersa ne’e.
Tuir dekretu-lei fundamenta katak Sekretária Munisipál ne’e kuajuva ba Administradór Munisipiu ka Prezidente Autoridade nia, laiha kbi’it ba atu deside, tanba desizaun ne’e iha Adminisstradór ka Prezidente Autoridade Munisipál nia liman.
“Sekretária Munisipál tenke asegura Munisípiu nia moris liuhosi nia kontribuisaun ba formulasaun desizaun hosi superiór tuir programa Governu liuliu ba implementasaun planu estratéjiku dezenvolvimentu nasionál 2011-2030.
Governante ne’e husu ba sidadaun hotu iha munisípiu sira atu kolabora ho Administradór ka Prezidente Munisípiu no nia Sekretária Munisipál sira hodi kontribui ba prosesu konstrusaun no poder lokál.
Iha fatin hanesan, empozadu Sekretária Munisipál Aileu, Felis Maria de Oliveira, komprometidu hodi halo servisu tuir lei durante nia mandatu.
“Primeru mak asegura lei sira tuir kompeténsia ne’ebé lei fó mai ha’u, atu halo servisu di’ak liu hodi dezenvolve no planu sira ne’ebé munisípiu deside ona liuhosi Konsellu Konsultivu Munisipál hasai ona no prevé ona iha Planu Asaun Anuál Munisípiu Aileu nian hodi bele dezenvolve munisípiu ne’e tuir hotu-hotu-nia hakarak”, nia afirma
Jornalista: Natalino Costa
Editór : Zezito Silva
