DILI, 03 maiu 2023 (TATOLI) – Vise-Prezidente Partidu Kongresu Nasionál Rekonstrusaun Timorense (CNRT, sigla portugés), Gil da Costa “Oan Soru”, husu ba povu, liuliu militante no simpatizante hosi partidu seluk atu hamutuk ho CNRT hodi depozita votu konfiansa ba Xanana Gusmão hodi kaer fali ukun iha tinan lima nia laran atu dezenvolve nasaun ne’e.
“Ha’u hakarak apela ba povu Timór laran tomak, liuliu militante hosi partidu ki’ik sira karik balun partisipa iha diálogu aberta ne’e, husu lalika estraga imi-nia votu iha Eleisaun Parlamentár tinan ida ne’e tanba votu ne’ebé sei fó ba imi-nia partidu ki’ik sira ne’e sei saugati de’it”, Gil Oan Soru husu iha ámbitu diálogu Partidu CNRT nian ne’ebé realiza iha suku Vila Verde, kurta ne’e.
Nia apela ba militante no simpatizante hosi partidu seluk atu la’o hamutuk iha filleira ida de’it hodi fó vitória ba CNRT “atu lori maun boot Kay Rala Xanana Gusmão asume fali kargu nu‘udar Primeiru-Ministru hodi bele lori hikas dezenvolvimentu nasionál ba Timor-Leste”.
Oan Soru haktuir katak kestaun boot ida maka partidu ki’ik sira hakarak atu liu barreira no ida ne’e tenke hetan votu konfiansa rihun 34. Ne’e duni nia konvense partidu ki’ik nia ema sira hanoin didi’ak atu votu ne’ebé fó ona labele saugati de’it.
“Ezemplu ki’ik ida maka iha Eleisaun Parlamentár 2017, partidu PUDD hetan votu konfiansa rihun 15, maibé la liu barreira. Se ida ne’e maka tenke akontese tan iha eleisaun 2023 ne’e imi sei soe votu de’it. Ha’u husu ba ita hotu atu prepara votu rihun 400 hodi fó ba Kay Rala Xanana Gusmão. Tanba ne’e, bainhira hamutuk ho CNRT mehi ne’ebé povu hakarak bele atinje”, nia dehan.
“Ba Prezidente Horta ita fó ona votu rihun 397, entaun ba Xanana ita tenke prepara tan votu rihun 400-resin hodi nune’e sira na’in rua bele hamutuk hodi lori nasaun ne’e ba dezenvolvimentu ida di’ak liu iha futuru”, realsa.
Jornalista: Tomé Amado
Editora: Maria Auxiliadora
