iklan

EKONOMIA, HEADLINE

Diskusaun revizaun lei saláriu mínimu hein governasaun foun

Diskusaun revizaun lei saláriu mínimu hein governasaun foun

Ministru Prezidénsia Konsellu Ministru, Fidelis Manuel Leite Magalhães. Imajen Tatoli/Francisco Sony

DILI, 03 maiu 2023 (TATOLI)—Ministru Prezidénsia Konsellu Ministru, Fidelis Manuel Leite Magalhães Leite, hateten, diskusaun kona-ba revizaun saláriu mínimu hein governasaun foun tanba mandatu VIII Governu Konstitusionál besik ramata.

“Konsellu Ministru deside lei sira la avansa ona tanba tempu badak liu, enkuantu dekretu-lei sira ne’ebé mak define katak iha liu natureza téknika no nesesidade atu halo korresaun ruma mak avansa ho dekretu-lei. Ita lakohi halo alterasaun sira tantu dekretu-lei ka lei, hirak  ne’ebé mak iha kona-ba lei saláriu mínimu ne’e presiza halo diskusaun kle’an no han tempu maibé agora mandatu Governu mós besik ramata ona, entaun hein Governu foun mai mak haree,” Ministru hateten iha Palásiu Governu, kuarta ne’e.

Notísia relevante : KSTL ezije Governu kria dekretu-lei ba saláriu mínimu antes mandatu termina

Aleinde ne’e, Governu haree katak bainhira haruka proposta foun ba Parlamentu Nasionál, sei laiha kalendáriu ba lejizlatura ida-ne’e no halo dokumentu sira kaduka.

“Bainhira dokumentu hotu ne’ebé agora Governu haruka ba mak lejizlatura ne’e ramata, mak sei kaduka automátika. Entaun buat ne’ebé VIII Governu halo mak preparadu tiha ona karik Governu tuir mai iha fali rekondusaun iha Governu nian, proposta sira ne’e sei aprezenta filafali,” nia akresenta.

Iha sorin seluk, Ministru Koordenadór Asuntu Ekonómiku, Joaquim Amaral, hateten, antes ne’e Kondefersaun Sidikadu Timor-Leste (KSTL) ezije ba Governu, liuliu Ministériu Koordenadór Asuntu Ekonómiku (MKAE) atu kria dekretu-lei kona-ba saláriu mínimu molok mandatu ramata.

“Karik servisu balun la konsege halo hotu, Governu ne’e kontinuidade mai tan mak kontinua., tanba diploma sira ne’e feitu ona no hein aprovasaun, ne’ebé ita hein Governu foun mai mak bele kontinua tanba proposta sira ne’ebé tama iha Prezidénsia Konsellu Ministru ne’e importante hotu. Ita hakarak lais maibé mós haree tempu no ajendamentu, tanba halo aprovasaun haree ida ne’ebé urjente liu,” nia dehan.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!