COVALIMA, 03 maiu 2023 (TATOLI)—Komandante Tránzitu Munisípiu Covalima, Inspetór Assistente Patricio de Jesus, hateten hahú hosi janeiru-marsu ne’e PNTL Covalima liuhosi seksaun tránzitu rejista kazu asidente tráfegu hamutuk 10.
“Hahú hosi fulan-janeiru to’o marsu, ita rejista kazu asidente 10 kompostu hosi motorizada xoke kareta, motorizada xoke sidadaun la’o ain, motorizada ho motorizada soke malu. Iha loron 29 fulan-abríl akontese asidente fatal iha Busa Kukun, ami infroma ba komandu jerál PNTL ne’ebé vítima mate iha fatin,” Komandante Tránzitu Munisípiu Covalima Inspetór Assistente Patricio de Jesus hateten ba jornalista sira iha komandu PNTL Covalima, Santa Rosa, kuarta ne’e
Kazu asidente ne’ebé seksaun tránzitu rejista 10 refere, iha kazu ualu (8) ne’ebé bazeia ba akordu hosi parte rua rezolve liuhosi família no la’ós tanba polísia mak obriga atu rezolve.
Razaun, nia dehan, tanba tipu kazu ualu (8) refere tama iha kazu kmaan ho kazu ho tipu kiik hanesan motorizada estraga kmaan, sidadaun kanek kmaan, prosesu tuir sidadaun sira-nia hakarak maibé sira kumpre hosi selu koima ba Estadu.
Ho nune’e, tuir nia, seksaun tránzitu submete kazu rua mak ba Ministériu Públiku (MP) no agora aplika Termu Identidade Rezidénsia (TIR) ba suspeitu tanba tipu kazu asidénte ho grave hodi hamate sidadaun.
“Kazu asidente iha Busa Kukun ita prosesu tuir lei no entrega ona ba Ministériu Públiku ne’ebé halo prosesu ona, nune’e hahú janeiru to’o abríl ita entrega ona kazu rua ba Ministériu Públiku,” nia hateten.
PNTL husu sidadaun kumpre regra tránzitu iha períodu kampaña
Aleinde ne’e, Inspetór Assistente Patricio de Jesus, husu ba sidadaun sira iha Covalima mantein kumpre regra tránzitu no lei kódigu estrada iha períodu kampaña eleitorál.
“Ha’u fó avizu ba sidadaun espesiál iha Covalima, ha’u la bandu ita-boot sira-nia dever atu tuir kampaña. Maibé, tenke mantein kumpre regra tránzitu no lei eleitorál mós iha períodu kampaña bandu, lori labarik kiik, tuur iha kapon leten, uza motorizada kanu resin, tenke lori dokumentu kompletu,” nia dehan.
Razaun husu sidadaun sira uza transporte tenke kumpre regra tránzitu no lei kódigu estrada nune’e sidadaun sira tuir kampaña no fila mós ho seguru bainhira la kumpre hanesan la taka kapasete bainhira asidente sei la salva sidadaun sira-nia vida.
Tanba, tuir lei eleitorál, iha períodu kampaña eleitorál bandu sidadaun sira uza motorizada kanu resin, tula labarik kiik, tuur iha kapon leten no seluk tan.
“Iha periódu kampaña nafatin kumpre regra lei kódigu estrada nian, tanba durante kampaña sidadaun balun uza motorizada kanu resin, ami hapara nune’e sira bele kumpre sira-nia dever balun tula ema na’in-tolu, la uza kapasete ami entrega ba koordenadór partidu atu fó atensaun,” nia hateten.
Nia hateten, durante kampaña eleitorál iha Covalima seksaun tránzitu halo apreensaun no haruka sidadaun troka motorizada ne’ebé uza kanu resin halo sidadaun sira troka hodi uza fali kanu normál no tenke kompleta ho dokumentu no fó atensaun labele uza tanba morizada kanu resin.
Entertantu, partidu polítika ne’ebé durante hala’o ona kampaña eleitorál iha munisípiu Covalima hanesan Partidu Dezenvolvimentu Nasionál (PDN), Partidu Os verdes de Timor, Partidu FRETILIN, CASDT, CNRT, PLPA no PLP.
Jornalista : Celestina Teles
Editór : Cancio Ximenes
