Manufahi hahú dezenvolve jardin multifunsaun
MANUFAHI, 03 maiu 2023 (TATOLI) – Administradór Munisípiu Manufahi Arantes Isaac Sarmento, informa tinan ida ne’e, Manufahi hetan projetu bo’ot rua ida kona-ba jardin multifunsaun, iha jardin ne’e sei tau mós eroi na’in haat nia estatua.
“Jardin ne’e ita hala’o tanba ita hetan projetu bo’ot hosi orsamentu Programa Dezenvolvimentu Integradu Munisípiu (PEEM) ba tinan ida ne’e nian, ida ne’e mak ita hadia jardin ho multifunsaun ida, iha eis-merkadu Munisípiu Manufahi”, administradór esplika ba jornalista sira iha Same, kuarta ne’e.
Nia dehan, jardin multifunsaun ne’e, tama ona ba faze konstrusaun. Ida ne’e importante tebes atu dezenvolve hodi hafurak sidade Manufahi.
Jardin ne’e konstrui atu destaka eroi na’in-haat ne’ebé mak konsidera lider istóriku ba libertasaun nasaun ida ne’e mak hanesan Dom Boaventura, Francisco Xavier do Amaral, Francisco Borza da Costa no eis Ministru primeiru Governu iha tinan 1975 “Kakuk”.
Nia hatutan, eroi na’in haat ne’ebé tau sei reprejenta eroi manufahi hotu ne’ebé durante ne’e luta ba libertasaun nasionál Timor-Leste nian.
Konstrusaun ba jardin ne’e kaer hosi kompaña lokál Jerota Unidos Unipesoal, LDA ho durasaun fulan sia, hahú 20 abríl no termina iha 31 dezembru 2023. Projetu ne’e halao ho orsamentu PDEM hamutuk $221, 140.52.
Jornalista: Hortencio Sanchez
Editór : Zezito Silva
