DILI, 03 maiu 2023 (TATOLI) – Partido Unidade Dezemvolvimento Democratico (PUDD) defende kafé, baunilla no kakau sai hanesan produtu prinsipál iha muniípiu Ermera hodi kontribui reseita ba Estadu.
Prezidente PUDD, Silvestre Xavier Sufa, iha ninia intervensaun, hateten PUDD hakarak aloka subsídiu bo’ot hosi osan Estadu ba agrikultór sira para halo rejenerasaun no rehabilatasaun ba kafé tuan sira.
“Se ita halo hanesan ne’e kafé ne’e fuan di’ak. Produtividade kafé iha Ermera tun no persiza hasa’e,” Silvester Xavier Sufa hateten, iha kampña eleitorál aberta, iha Glenu-Ermera, kuarta ne’e.
Sekretáriu-Jerál PUDD, Aleixo de Carvalho ‘Avança’, mós hato’o katak PUDD nia programa prinsipál ida mak halo rehabilitasaun kafé tuan para bele fó benefsiu ba povu Ermera oan sira.
“Kafé tuan sira ne’e ninia produsaun menus ona, entaun esportasaun mós menus, tanba ne’e mak ita tenke halo rejenerasaun,” nia dehan.
Aleixo de Carvalho ‘Avança’ mós haktuir katak Ermera iha poténsia hodi dezenvolve baunilla: “Ita bele prodúz baunilla iha Ermera para bele hatama reseita ba munisípiu.”
“Joven barak ne’ebé mak hasai kursu iha área agrikultura, tinan-tinan ne’e halimar hela. Entaun ita lori fali sira ba munisípiu para bele dezenvolve kafé, baunilla no kakau para hatama reseita ba munisípiu no Estadu. Ita sei reforsa joven sira ho formasaun di’ak para sira bele dezenvolve kafé, baunilla no kakau iha Ermera,” dirijente akresenta.
PUDD mós tau prioridade ba dezenvolvimentu estrada rurál atu bele fasilita komunidade iha área ruruál asesu ba merkadu.
“PUDD ninia programa prinsipál ida ba munisípiu Ermera, karik hetan fiar kaer ukun mak foku ba turizmu komunitáriu no relizioju sira. Governu sei tau osan para hadi’a, depois bele atrai turista sira ba vizita, hodi hatama reseita ba kofre Estadu ” responsável realsa.
Jornalista: Filomeno Martins
Editor: Nelia Borges
