LIQUIÇA, 03 maiu 2023 (TATOLI)— Diretór Sekretariadu Tekniku Administrasaun Eleitor (STAE) Munisípiu Liquiça, Mario dos Santos Martins informa iha suku haat (4) mak susar atu asesu ba sentru votasaun iha loron Eleisaun Parlamentar (ElPar) 2023, bainhira akontese udan.
“Ita nian iha suku Gugleur, Acumano, Hatuquesi no Fahilebo. Suku haat ne’e, kuandu udan bo’ot labele asesu ba no, la’os sentru votasaun hotu, maibé iha sentru balun ita labele asesu tanba estrada rai mean no kois hakarak ka lakoi tenke selu ema hodi lori material sira ne’e ba to fatin,” Mario dos Santos Martins dehan iha nia knaar fatin STAE Liquiça, kuarta ne’e.
Nia esplika, STAE rasik antes ne’e halo ona levantamentu ba sentru votasaun 85, tanbá hakarak ka lakoi iha loron 20 fulan maiu material sira ne’e tenke to’o iha fatin votasaun.
Atu solusiona kestaun ne’e, STAE preve ona orsamentu ho montante $1.500 hodi asegura bainhira kareta labele asesu ba sentru votasaun, nune’e tenke selu ema hodi lori ka transporta material ba eleisaun.
Diretór STAE Munisípiu Liquiça mós halo ona kordenasaun ho parte Administrador Munisípiu Liquiça hodi orienta Ministériu Obras Públika atu buka solusaun imediatamente ba kestaun estrada.
“Maibe ita hatene katak agora tempu udan hela, ohin sira ba dudu no aban udan mai estraga nafatin no hakarak ka lakoi tenke preve duni osan ba ne’eba tanba selae to eleisaun mak udan mai tiha kareta labele ba entaun ita labele halo buat ida,” nia afirma.
Xefe Suku Açumano, Bernardino Martins rekoñese kondisaun hirak ne’e mak sai fatór determinasaun susesu ba ElPar 2023, maibé ne’e responsabilidade estadu no governu, tanbá autoridade lokal rasik halo ona sosializasaun ba komunidade hodi partisipa iha ElPar.
“Ita nia preokupasuan primeiru mak estrada tanba iha tempu udan dalaruma estrada lakon tiha, no udan para tiha mak estrada foin mosu. Segundu, difikuldade mak ita laiha eletrisidade, foin hahu no ita lahatene bainhira mak remata, asuntu rua ne’e nesesidade nebeé presiza fó atensaun,” nia haktuir.
Maske nune’e, Bernardino Martins konfirma rizku hira ne’e ladun bo’ot tanba depende deit ba klima no sei iha kauza barak bainhira udan la para durante semana ida. Nia espera ElPar 2023 bele la’o ho susesu no partisipasaun komunidade tenke maximu iha festa demokrasia refere.
Munisípiu Liquiça rasik iha eleitor hamutuk 53,084 ne’ebé kompostu husi Postu Adminitrativu tolu (3), no suku 23. STAE mós prepara ona brigadista 85 inklui polling staff 1060 hodi fasilita servisu durante ElPar 2023 ne’ebé sei realiza iha loron 21 maiu mai.
Jornalista : Cidalia Fatima
Editora : Armandina Moniz
