AILEU, 03 maiu 2023 (TATOLI) – Diretora Sekretariadu Tékniku Administrasaun (STAE), Munisípiu Aileu, Romana de Jesus Alves, informa STAE munisipál agora daudaun identifika kondisaun estrada ba fatin sentru votasaun neen mak grave tanba ne’e sei iha difikuldade tékniku bainhira STAE transporta urnas eleisaun.
“Iha Aileu rasik ami identifika fatin sentru votasaun neen mak sei sai hanesan probema hodi difikulta tékniku sira bainhira transporta materiál sensetivu tanba kondisaun estrada ba iha fatin ne’e aat tanba ne’e sei difikulta prosesu transportasaun materiál eleisaun nian”, Romana de Jesus Alves hateten ba jornalista sira hafoin partisipa abertura formasaun ba ofisiál eletorál iha salaun Timor Klaran Aileu Vila, kuarta ne’e.
Nia esplika, kondisaun estrada iha Suku Asumau no Leorisa Postu Administrativu Remexio aat no grave tebes, agora daudaun tempu udan ne’e aumenta grave iha sentru votasaun rua iha fatin ne’ebá, araska tebes atu transporta materiál eleisaun nian.
Iha Postu Administrativu Laulara, Aldeia Lebukuku, Suku Fatubosa iha sentru votasaun ida maibé kondisaun dalan grave no sei difikulta prosesu transportasaun materiál eleisaun nian.
Aleinde ne’e mós, iha Postu Aileu Vila iha Suku Seloi Kraik, iha sentru votasaun haat maibé estrada iha fatin ne’e ba grave tanba ne’e mak sei difikulta tékniku sira bainhira transporta material sensetivu no non sentivu ba iha fatin refere.
“Tanba ne’e ami konderna ona ekipa Ministériu Obras Públik, se bele normaliza estrada sira iha sentru votasau sira ne’e atu bele ajuda STAE halo trasportasaun ba iha fatin sentru votasaun ne’e ho di’ak”, Romana de Jesus Alves rekomenda.
“Ami-nia esperansa katak eleisaun sei la’o ho di’ak, ami iha vontade servisu makas atu eleisaun eleisaun bele susesu”, nia afirma.
Tuir dadus, sentru votasaun iha Munisípiu Aileu iha 93 no iha estasaun votu 105. Totál eleitór ne’ebé tuir votasaun iha eleisaun parlamentár 21 maiu hamutuk 34.962.
Iha fatina hanesan, Administradór Postu Administrativu Remexio Gastão Mendonça ‘Tigri’ rekoñese estrada iha Postu Administrativu Remexio, iha tempu udan aat no iha kondisaun gravé.
Maibé parte kompañia ne’ebé manan iha konkursu hodi reabilitasaun estrada iha Remexio, sira hahú ba aprezenta ona ba Administradadór Postu Administrativu Remexio no tau ona sira ekipamentu iha postu, iha semana ida ne’e sira bele hahú reabilitasaun ba estrada.
“Kompañia ne’ebé mak manan iha konkursu, reabilitasaun estrada iha Remexio ne’e kompañia lokál”, nia afirma.
Jornalista: Natalino Costa
Editór : Zezito Silva
