MANUFAHI, 04 maiu 2023 (TATOLI) – Administradór Munisípiu Manufahi Arantes Isaac Sarmento, hateten autoriedade munisípiu hanoin ona oinsa atu dezenvolve fatin Erlesu sai hanesan turizmu komunitáriu hodi dada vizitante sira mai vizita no hatama reseita.
“Erlesu ne’e agora ema barak mai vizita, ita hanoin ona atu dezenvolve liután, antes ne’e munisípiu hetan apoiu hosi doadór sira ne’e mak dezenvolve tia maibé seidauk sufisiente, ita atu dezenvolve liután mak ita sei haree hela ba orsamentu kuandu iha ne’e ita sei dezenvolve sai furak liután”, Administradór dehan ne’e ba jornalista sira iha edifísiu Administrasaun Munisípiu Manufahi, kinta ne’e.
Aleinde Erlesu iha mós bee lulik ida iha Suku Rotuto Postu Administrativu Same-Vila mós sei dezenvolve sai hanesan turizmu komunitáriu ne’ebé Ministériu Turizmu Komérsiu no Indústria (MTKI) halo ona identifikasaun.
“Munisípiu servisu hamutuk ho Ministériu Turizmu hodi identifika fatin turizmu sira atu bele tau orsamentu hodi dezenvolve, ne’e mak Rotuto ne’e iha bee lulik ida iha ne’ebá sei sai hanesan sentru ba turizmu komunitáriu”, nia relata.
Nia dehan, loloos fatin potensiál sira hanesan Erlesu no Rotuto, munisípiu bele dezenvolve mesak maibé difisíl iha orsamentu tanba orsamentu hosi nasionál mai munisípiu la sufisiente.
“Fatin turizmu iha Manufahi ne’e barak, iha Fatuberliu iha, Alas iha Turiskai mós iha, ezemplu hanesan Fatuberliu iha bee manasida iha ne’ebá, ida ne’e mós ita presiza dezenvolve mós, ida ne’e mak ita agora hadia uluk estrada atu nune’e ita dezenvolve tenke iha kondisaun ne’ebé di’ak hanesan estrada di’ak atu ema ba labele falla, iha sentina di’ak, eletrisidade tenke garantidu, liña internet mós tenke di’ak”, nia informa.
Maibé nia otimista katak iha futuru mosu dezentralizasaun no poder lokál mak fatin potensiál hirak ne’e sei dezenvolve hotu.
Enkuantu, bee Erlesu daudaun ne’e atrativu tebes tanba kada loron vizitante kuaze ema liu 100-resin mak ba vizita fatin ne’e hodi haris no hasai fotografia tanba pasajen iha fatin ne’e furak tebes.
Erlesu lokaliza iha Suku Holarua Posto Administrativu Same Munisípiu Manufahi iha kedan estrada boot bainhira hosi Dili mai Kapitál Munisípiu Manufahi tenke liu uluk hosi bee ne’e.
Jornalista: Hortencio Sanchez
Editór : Zezito Silva
