CASDT sei fó kréditu ba kompañia kafé lokál bainhira ukun
ERMERA, 04 maiu 2023 (TATOLI) – Bainhira povu fó fiar kaer governu, sei fo kréditu ba emprezariu no kompaña kafé lokál atu iha kapasidade kompete ho kompañia estranjeiru hodi hasa’e kafe folin, nu’udar kompromisu Partidu Centro de Ação Social Democrática Timorense (CASDT), iha Ermera.
“Agora, planu CASDT nian mak Governu tenke fó ona tempu ba kompañia Timoroan sira no mós kompañia lokál iha Timor-Leste. Ita fó kreditu ba kompaña lokál sira ne’e no kompañia nasionál sira iha Dili laran tomak para sira mós bele iha kbiit hodi sosa kafé,” Prezidente Partidu CASDT, Izac do Rosario hateten.
Iha kompromisu polítika ne’ebé partidu ho sorteiu 13 hato’o durante mini-kampaña iha Suku Mau-Ubo, Postu Adminsitrativu Hatulia B, Munisipiu Ermera, prezidente CASDT, Izac do Rosário hateten, bainhira kompañia lokál iha kbiit hodi sosa kafé mak sei halakon monopoli kafé folin husi kompaña estranjeiru sira.
“Se ita-nia kompañia kafé lokál sira bele kompete ho kompañia estranjeiru atu nune’e kompaña rai-li’ur sira labele halimar ka monopoli kafé folin iha baze,” Izac akresenta.
Líder másimu husi partidu polítiku ho lema ‘Justisa, Unidade, Solidariedade’ ne’e reiteira katak dalan di’ak liu mak Estadu tenke fó ona kréditu ba kompaña lokál sira atu sira bele kompete hodi hasa’e kafé folin. “Se iha kompetisaun ona otomatikamente kafé folin tenke sa’e de’it tanba ema barak mak sosa.”
“Se bainhira ema barak sosa no kafé folin sa’e, bele hasa’e rendimentu ekonomia kafekultór sira nian hodi sustenta ekonomia uma-laran. Ida ne’e planu CASDT nian no karik povu agrikultór sira fó votus ba CASDT mak ita sei hakilar ba ida ne’e,” nia salienta.
Partidu CASDT Izac do Rosario hateten, fó kreditu ba kompaña kafe lokál sira mak sei loke dalan ba sirkulasaun osan iha rai-laran hodi dezenvolve mós setór seluk no loke serbisu ba joven sira.
Iha mini kampañia ne’e, Prezidente CASDT mós levanta kestaun hamenus pratika uzu-kustume fetosá umane hodi ajuda povu Ermera rai osan hodi sustenta ekonomia família no haruka oan ba eskola.
“CASDT apoiu tebes planu estratejia Administradór Munisípiu Ermera no Igreja liga ho asaun tara-bandu para hamenus prátika uzu-kustume. Ida ne’e la’ós taka maibé hamenus de’it para nune’e reduz gasta osan. Entaun osan ne’ebé mak ita rai, ita bele uza hodi sustenta ita-nia ekonomia uma-laran no dudu ita-nia oan sira ba eskola to’o nível universidade.
Autoridade másimu CASDT ne’e haktuir, Munisípiu Ermera iha osan barak, maibé estastikamente hatudu katak Ermera ki’ak tanba gasta osan barak ba fetosá umane no prátika kustume seluk.
Jornalista : Filomeno Martins
Editora : Nelia Borges
