Eleitór 99.158 hosi Baucau elijível vota iha eleisaun parlamentár
BAUCAU, 04 maiu 2023 (TATOLI) – Sekretariadu Tékniku Administrasaun Eleitorál (STAE) munisípiu Baucau rejista eleitór 99.158 ne’ebé sei ezerse vota iha eleisaun parlamentár tinan-ne’e.
Diretór STAE Baucau, Natividade Freitas Guterres, esplika, hosi númeru refere komposta hosi mane nain-51.239 no feto nain-47.919 nune’e munisípiu Baucau segundu lugár nu’udar munisípiu ne’ebé eleitorál barak hafoin Dili.
“Resensiamentu ita taka ona hosi loron-30 antes eleisaun, labele book ona dadus tanba fó-sai ona iha Jornál Repúblika,” Diretór STAE Baucau informa ba Agência TATOLI iha Vila Nova, kinta ne’e.
Hosi tótal númeru refere, munisípiu Baucau aumentu eleitór na’in-529 bainhira halo komparasaun ho totál eleitór iha eleisaun prezidensiál tinan-2022 ne’ebé hamutuk 98.629.
STAE Baucau rasik remata ona atualiza dadus eleitór no sei kontinua ho atividade atendimentu emerjénsia ba eleitór ne’ebé kartaun lakon, aat no tohar ne’ebé tuir lei sei taka iha loron-15 antes eleisaun parlamentár.
“Baucau aumenta taxa partisipasaun entaun ita-nia preparasaun aumenta tán sentru votasaun no estasaun votasaun hodi hakbesik ba eleitór nune’e fasil eleitór atu tuir eleisaun,” Natividade Guterre akresenta.
STAE Baucau mós halo ona planu atu mobiliza transporte materiál sensitivu no la’ós-sensitivu ba sentru votasaun hanesan identifika karreta estadu iha Baucau, aluger inklui sei hetan apoia hosi STAE nasionál.
STAE Baucau rejista sentru votasaun 150 no estasaun votu hamutuk 180, hosi totál brigada na’in-150 no ofisiál eleitorál 1.800.
Jornalista : Natalino Belo
Editór : Evaristo Soares Martins
