Empreza tolu implementa projetu estrada Tutuluro
MANUFAHI, 04 maiu 2023 (TATOLI) – Administradór Munisípiu Manufahi Arantes Isaac Sarmento, informa iha ona empreza lokál hamutuk tolu mak implementa projetu estrada Tutuluro, ligasaun Same-Vila ba Truriskai ho kilometru ualu ne’ebé ho kondisaun grave tebes.
“Estrada ba Tutuluro, ita haree katak iha área rurál ho kondisaun grave, administrasaun munisípiu foti inisiativa ida bazeia ba konsellu kordenasaun munisipál atu toma desizaun katak projetu estrada ba Tutuluru empreza tolu mak tenke implementa projetu ne’e, ho kategoria projetu estrada rurál”, Arantes dehan ba jornalista sira iha edifísiu Administrasaun Munisípiu Manufahi, kinta ne’e.
Nia dehan, kontratu ho empreza tolu ne’e asina ona ho administrasaun munisípiu no daudaun ne’e empreza halo ona implementasaun no administrasaun fó durasaun loron 20 tenke halo ona mobilizasaun ekipamentu ba fatin ne’ebé identifikadu.
Bainhira liu loron 20 mak empreza la halo mobilizasaun ekipamentu mak administrasaun munisípiu sei hapara kontratu.
“Maibé tuir ami-nia observasaun iha terenu, projetu la’o namanas hela hosi Empreza sira, ita fiar katak sira bele implementa projetu hotu ho susesu”, aministradór dehan.
Projetu ne’e hala’o tanba hetan orsamentu hosi Programa Dezenvolvimentu Integradu Munisípiu (PDEM) ho montante rihun $200-resin no Empreza tolu ne’e sei fahe hanesan hosi totál ne’ebé iha ona.
Empreza tolu ne’ebé implementa projetu ne’e mak hanesan Ablaiana, Fergo no Turila.
“Empreza tolu kaer obra estrada ne’e ho osan la hanesan, maibé sira na’in tolu sei fahe malu osan rihun $200-resin ne’e”, nia esplika.
Projetu estrada Tutuluru ne’e hanesan faze primeiru no sei iha tan faze segundu atu kontinua estrada ne’e liga direta hosi Same-Vila ba Postu Administrativu Turiscai no sei liu kedan ba Suku Mindelu maibé ne’e planu ba tinan oin nian.
Jornalista: Hortencio Sanchez
Editór : Zezito Silva
