Instalasaun eletrifikasaun iha Cararas no Weluli manas benefisia uma-kain 186
VIQUEQUE, 04 Maiu 2023 (TATOLI)–Eletricidade de Timor-Leste, Empresa Pública (EDTL, E.P) lansa projetu eletrifikasaun iha Cararas no Ueluli Manas hosi área Bubur Laran kompostu hosi suku Uaimori, postu Viqueque Villa no suku Loi-Hunu, postu Ossu, ne’ebé sei benefisia uma-kain 186.
Administradór Munisípiu Viqueque, Januário Soares ‘Bolly’ husu komunidade aldeia Bubur Laran atu koopera no kontribui iha prosesu instalasaun liña eletrisidade hodi bele benefisia abitante sira ne’ebé durante ne’e la asesu eletrisidade.
“Horiseik kuarta (03/05) ita lansa ona projetu eletrifikasaun iha área Bubur Laran, ne’ebé hanesan pasu di’ak ba ita-nia komunidade tanba Kuaze tinan barak sira la asesu ahi eletrisidade. Tanba ne’e ha’u hakarak husu ba komunidade tenke kolabora atu nune’e projetu ne’e di’ak,” Administradór munisípiu Viqueque, hateten iha administrasaun, kinta ne’e.
Notísia relevante : Suku Liaruka Viqueque asesu ona liña eletrisidade
Projetu hirak ne’e mak hanesan nova instalasaun liña média tensaun kilómetru 6 resin (MT 6,2 KMS), liña baixa tensaun kilómetru 3 resin (BT 3,75 KMS), trasformadór no instalasaun baixa ba komunidade nia uma.
Infraestrutura ne’e implementa hosi empreza Tula Eli Unip, Lda JV Waida Unip, Lda, ho durasaun kontratu fulan-neen, ho totál orsamentu $361.791,48.
Jornalista : Vitorino Lopes da Costa
Editora : Julia Chatarina
