Manufahi poténsia ba setór importante tolu
MANUFAHI, 04 maiu 2023 (TATOLI) – Administradór Munisípiu Manufahi Arantes Isaac Sarmento, informa tuir Planu Estratéjiku Dezenvolvimentu Munisípal (PEDM) define área prioridade hamutuk tolu ne’ebé presiza dezenvolve makas hodi hatama reseita ba Estadu.
“Manufahi iha área potensiál sira hanesan, turizmu, agrikultura no poténsia mós ba indústria, área hirak ne’e hotu ita iha planu oinsa atu dezenvolve maibé save importante mak tenke haree uluk iha infraestrutura baze, tanba ko’alia ba turizmu ita tenke kria uluk kondisaun, kona-ba área seluk ne’e mós hanesan ita tenke kria uluk kondisaun”, Arantes hateten ba jornalista sira iha edifísiu Administrasaun Manufahi, kinta ne’e.
Nia dehan, munisípiu nia polítika mak bainhira iha ona orsamentu rasik sei dezenvolve área potensiál sira ne’ebé mak identifikadu ona iha Manufahi.
“Ha’u hakarak hatete katak munisípiu ida ne’e tinan ida de’it, lalika barak, milaun $5 ida ba de’it infrastrutura, ita bele rezolve kedan, tanba Manufahi loloos ne’e kona-ba estrada ita ladun preokupa ona, ita so preokupa estrada rurál sira, entaun ita rezolve hotu tia ita bele haree fali kondisaun sira seluk nian”, nia relata.
“Maibé kompeténsia munisípiu nian ida define iha dekretu lei nú 3 mak identifika iha ita-nia diresaun ida bolu jestaun merkadu no turizmu, maibé nia knaar ne’e identifika de’it área poténsia sira hanesan, turizmu no seluk tan, kuandu identifika tiha tenke aprezenta labele ba tan ona, kompeténsia boot ne’e iha nasionál, tan mai iha ne’e orsamentu kiik no labele halo buat ida, munisípiu nia orsamentu mak Planu Dezenvolvimentu Integradu Munisípiu (PDEM) fonte seluk, hosi ne’e laiha entaun mak difikulta ita-nia servisu sira iha munisipiu hodi dezenvolve área importante sira liuliu turizmu”, nia hateten.
Tanba ne’e, munisípiu sei halo hela jestaun oinsa jere orsamentu hosi PDEM, tinan ida ne’e ba Manufahi hamutuk rihun $800-resin atu implementa projetu komunitariu sira liuliu infraestrutura bázika fazeadamente kada tinan to’o tinan lima.
Jornalista: Hortencio Sanchez
Editór : Zezito Silva
