AILEU, 04 maiu 2023 (TATOLI) – Ministériu Agrikultura no Peskas (MAP) liuhosi Dirasaun Nasionál Agrikultura no Ortikultura fó formasaun ba agrikultór sira iha Munisípiu Aileu atu utiliza adubu hodi bele hasae produsaun agríkula.
“Formasaun ida ne’e durante loron ida. Importante tebes ba natar nain sira atu sira bele aprende oinsá uza adubu ne’ebé di’ak hodi hasae produsaun haré iha Munisípiu Aileu”, Diretór Agrikultura Munisípiu Aileu, João dos Santos ba jornalista sira hafoin konklui partisipa formasaun utilizasaun adubu ba agrikultór iha Salaun MAP Aileu Vila, kinta ne’e.
Nia husu ba natar nain sira atu fó tempu hodi aprende ho di’ak durante formasaun, nune’e bele implementa iha sira nia natar atu hasae produsaun kada tinan.
Iha fatin hanesan, Xefe Departementu Mekanizasaun Produsaun Alimentár Jestaun MAP Suzana Constançia Vila Nova, hateten objetivu hosi formasaun ne’e atu hasa’e koñesementu agrikultór sira iha Aileu, liuliu natar nain sira oinsá uza adubu ne’ebé di’ak atu bele hasa’e produsaun. iha munisípiu Aileu.
“Formasaun ne’e halai liu ba utilizasaun adubu orgániku ho tipu Adubu Nasa, Super Nasai inklui Hormóniku atu ita-nia agrikultór sira iha Aileu bele komprende ba iha utilizasaun adubu ne’e, atu karik sira bele ba fali sira nia natar bele aplika hodi bele aumentu ba produsaun”, nia dehan.
Nia dehan, Departementu Mekanizasaun Produsaun Alimentár Jestaun iha MAP halo ona programa formasaun ne’e ba natar nain sira iha munisípiu 13 inklui RAEO no hatudu progresu.
“Ita-nia produsaun kada tinan hahú aumenta no formasaun sira ne’e MAP sei kontinua, hodi haforsa argrikultór sira atu aumenta ita-nia produsaun agríkula”, Suzana Constançia Vila Nova. hateten.
Jornalista: Natalino Costa
Editór : Zezito Silva
