MTCI-MAE loke feira nasionál iha portu
DILI, 04 maiu 2023 (TATOLI) – Ministériu Turismu Komérsiu no Indústria hamutuk ho Ministériu Administrasaun Estatal halo abertura ba feira nasionál hodi komemora loron restaurasaun independénsia Timor-Leste ba dala XXI iha Portu Dili.
“Feira ida ne’e, hahú ohin 04 to’o 20 maiu ho objetivu atu komemora loron restaurasaun independénsia ba dala XXI, tan ne’e komisaun organizadora feira nasionál konvida komersiante produtu lokál hanesan faan ai-han no bebidas inklui artezenatu sira”, Diretór Jerál Turizmu iha MTCI Jelino Soares, dehan liuhosi nia diskursu iha feira nasionál.
Nia informa, liuhosi feira ne’e, husi komisaun organizadora servisu hamutuk organizasaun sira seluk hodi anima vizitante no komunidade sira durante feira ne’e lao.
“Hakarak informa katak iha eventu ne’e grupu 121 mak faan ai-han no bebida no grupu artezenato 51. Aleinde produtu sira ne’ebé mak ha’u temi iha mós festivál ai-han lokál no kompetisaun sira hanesan dramband ba estudante sira no mós kompetisaun pintura sira ne’ebé partisipa husi ema hamutuk 20”, nia esplika.
Iha fatin hanesan, Ministru Turizmu Komérsiu no Indústria, Jose Lucas do Carmo da Silva, hateten iha ámbitu selebrasaun ba loron restaurasaun independénsia iha loron 20 maiu ba dala XXI ne’e, VIII Governu konstitusionál liuhosi MTCI servisu hamutuk ho Ministériu Administrasaun Estatal, liña ministerial sira, setór privadu, produtór sira no parseiru sira hodi organiza feira produtu lokál ida ne’e.
“Objetivo husi feira ida ne’e, hakarak fó oportunidade ba populasaun timor laran tomak liuliu ba populasaun sira iha Munisípiu Dili atu bele mai diverte hamutuk, halo kontatu ema ho ema, nakonu ho domin, dame, pás no estabilidade hodi halo kreatividade, inovasaun no dezenvolvimentu sosiál, kulturál no ekonómiku, haburas indústria kreativa, kria servisu, hasa’e rendimentu no diversifika ekonomia iha ita-nia rain”, Jose Lucas afirma.
Ministru Administrasaun Estatal, Miguel Pereira de Carvalho, dehan atu komemora loron restaurasaun independénsia ida ne’e mak loke feira ba publiku.
“Ita loke feira ida ne’e atu komemora loron restaurasaun indepdensia ba dala XXI, entaun ho feira ida ne’e ita loke ba iha fatin haat hanesan ida mak iha portu, ida seluk iha Kristu Rei, Metinaro no Dom Aleixo. Entaun ita-nia populasaun iha Dili laran divertidu hodi partisipa iha feira sira hanesan artezenatu kulináriu no divertimentu hahú husi ohintoo 20 de maio 2023”, nia konklui.
Jornalista : Felicidade Ximenes
Editór : Zezito Silva
