Ofisiál eleitorál hala’o edukasaun votante iha Oé-Cusse
OÉ-CUSSE 04 maiu 2023 (TATOLI) – Diretór Sekretariadu Tékniku Administrasaun Eleitorál (STAE), Rejiaun Administrativa Espesiál Oé-Cusse Ambeno (RAEOA), Luiza da Costa, informa, brigadista sira hamutuk ho ofisiál tékniku sira hala’o ona edukasaun votante ba eleitór sira iha fatin publiku.
“Edukasaun votante ba eleitór sira hotu ona, ita-nia brigadista sira hamutuk ho ofisiál sira hahú iha loron 24 no remata iha 01 maiu, alvu ba iha fatin publiku sira iha territóriu Oé-Cusse, ba merkadu, sede suku, sede aldeia no eskola hanorin ita-nia eleitór oinsa vota ho loloos, labele vota sala, tanba iha eleisaun liuba, vota nulu barak,” Luiza da Costa, hatete, iha Oé-Cusse, kinta ne’e.
Daudaun ne’e ekipa hosi STAE kontinua fasilita formasaun ba ofisiál eleitorál sira durante loron rua, iha sub-rejiaun haat, atu garante atendimentu di’ak, imparsiál no neutralidade iha loron eleisaun parlamentár.
“Ohin komesa hala’o formasaun ba polin-staf sira, loron primeiru hahú iha Oésilo fatin rua no parte Nítibe fatin ida, durante loron rua, tuir mai sei hala’o fali ba poling-staf sira iha Pássabe no Pante Makasar loron rua, tanba oráriu formasaun ne’e hahú loron 4 to’o 9 maiu ne’e,” nia afirma.
Entretantu, totál eleitór ne’ebé STAE rejista hodi tuir eleisaun iha Oé-Cusse hamutuk 54.291, mane 27.681 feto 26.610, ho totál sentru votasaun 80 no estasaun votasaun 115 estabelese ona iha territóriu Oé-Cusse.
Jornalista: Abílio Elo Nini
Editór: Evaristo Soares Martins
