Polísia Tránzitu Covalima kontribui $8,363 ba kofre Estadu
COVALIMA, 04 maiu 2023 (TATOLI)–Komandante Polísia Tránzitu Munisípiu Covalima, Inspetór Assistente Polísia Patricio de Jesus, hateten iha trimester dahuluk ne’ebé hahú hosi janeiru to’o -marsu 2023 ne’e, polísia tránzitu Covalima rekolla no konribui koima $8,363 ba kofre Estadu.
“Hahú hosi janeiru to’o marsu 2023 ne’e, polísia tránzitu Covalima konstribui ona koima $8,363 ba kofre Estadu,” Inspetór Assistente Polísia Patricio de Jesus hato’o ba jornalista sira iha nia kna’ar fatin, Santa Rosa, tersa ne’e.
Polísia tránzitu rekolla koima ne’e mai hosi fonte infratór sira ho totál hamutuk 385, ne’ebé kompostu hosi motorizada hamutuk 336 no karreta hamutuk 49 mak kumpre hodi selu nune’e hodi bele kontribui koima ba kofre estadu.
Ho total infratór ne’ebé kumpri sira-nia dever, nune’e PNTL liuhosi sesaun tránzitu durante fulan tolu rekolla koima $8.363 ba kofre estadu.
Nune’e, nia dehan, ho totál infratór hirak ne’e durante fulan tolu, polísia tránzitu Covalima rejista kazu asidénte trafégu 10 ho tipu sira hanesan karreta xoke sala motorizada ida (1), motorizada ho motorizada xoke malu hitu (7), karreta ho motorizada xoke malu ne’e iha ida (1) no motoridaza xoke sidadaun la’o ain ne’e iha na’in-ida (1).
Jornalista : Celestina Teles
Editór : Cancio Ximenes
