Profesór kontratadu 65 iha Manatuto asina ona kontratu
MANATUTO, 04 maiu 2023 (TATOLI)—Diretór Diresaun Servisu Edukasaun Munisóipiu Manatuto, Graciano de Jesus Baptista, hateten profesór kontratadu na’in-65 iha Manatuto asina ona kontratu bele hanorin iha 2023.
Notísia Relevante: MEJD adia prosesu asina kontratu ba profesór kontratadu 1.715
“Ba profesór voluntáriu sira iha primeira faze asina kontratu ne’e ema na’in-65 no ba faze daruak mak sei iha prosesu nia-laran no hein rekursu umanu prepara no enkamiña ba nasionál hetan aprovasaun no publika iha jornal da repúblika,” nia hateten ba Agência iha nia kna’ar fatin, kinta ne’e.
Ba profesór kontratadu 65 ne’e sei koloka ba nível pre-eskolar to’o iha nível ensinu sekundáriu no profesór kontratadu hirak ne’e kobre hosi postu neen iha munisípiu Manatuto.
Ministru Edukasaun Juventude no Desportu (MEJD), Armando Maia, hatete dadus loloos profesór ne’ebé ninia dokumentu liu iha selesaun ne’e iha de’it 1.539, maibé depois halo tan selesaun ba profesór voluntáriu 176 ne’ebé hanorin programa eskola iha uma ne’e mak númeru profesór voluntáriu ne’ebé hakat ona ba kontratadu ne’e sa’e ba 1.715.
Hosi totál dadus profesór voluntáriu 1,715 ne’ebé hakat ona ba kontratadu ne’e mai hosi eskola edukasaun Pre-Eskolár (EPE) iha 121, Ensinu Báziku (EB) iha 894, Ensinu Sekundáriu Jerál (ESG) iha 398, Ensinu Sekundáriu Tékniku Vokasionál (ESTV/TEKVOK) iha 126 no edukasaun programa eskola iha uma hamutuk profesór 176.
Jornalista : Osória Marques
Editór : Cancio Ximenes
