DILI,04 maio 2023 (TATOLI) – Rezisténsia Nasionál Estudante iha Timor-Leste (RENETIL) lamenta ho partidu polítiku balun uza komísiu eleitorál sira hodi halo atake pesoál ba individu ka líder husi partidu polítiku seluk.
“RENETIL lamenta katak partidu polítiku balun uza komísiu eleitorál sira hodi halo atake pesoál ba individu ka líder husi partidu polítiku seluk no la konsentra iha esklaresimentu ba ida-idak nia programa polítika sira”, hateten iha komunikadu ne’ebé TATOLI asesu, ohin.
RENETIL nia observasaun no rejista iha insidente no provokasaun balun, maibé asaun hirak ne’e autoriedade polisiál bele foti medida hodi prevene.
RENETIL apresia Governu nia desizaun hodi mobiliza unidade balun husi Falintil-Forsa Defeza Timor-Leste (F-FDTL) hodi apoia Polísia Nasionál Timor-Leste (PNTL) atu garante seguransa, liuliu iha área sira ne’ebé identifika ho poténsia konflitu violentu. Maibé RENETIL kontinua fó hanoin atu mantein regra no prosedimentu ne’ebé klaru atu garante katak engajamentu Forsa Defeza nian apoiu ba manutensaun orden públiku ne’e lao tuir lei.
RENETIL fiar katak ho esforsu husi elementu hotuhotu hosi sosiedade Timor-Leste nian, Eleisaun Parlamentar 2023 sei lao iha ambiente ne’ebé pasífiku no sai eleisaun ida ne’ebé livre no justu.
RENETIL husu ba autoriedade seguransa no orden públiku nian atu kontinua halao sira nia servisu ho profisionál no tane a’as prinsípiu imparsialidade no ba povo tomak atu uza kampaña eleitorál ne’e hanesan oportunidade atu hatene didiak partidu sira nia kapasidade no programa polítiku, hodi ikus mai bele hili loloos partidu ida ne’ebé bele reprezenta povu nia aspirasaun sira no la monu iha aktus provokasaun sira atu halo violénsia
RENETIL husu ba partidu polítiku sira atu uza kampaña eleitorál hanesan oportunidade ba halao edukasaun sívika no hanesan oportunidade ida ba konsolidadaun pás, demokrasia no haburas toleránsia iha Timor-Leste.
RENETIL sei hala’o observasaun ba Eleisaun Parlamentár 2023, hahú husi períodu kampaña eleitorál to’o votasaun no kontajen votus, ho observadór na’in 200 resin, ne’ebé naklekar iha territóriu tomak, ho esepsaun Munisípiu Aileu no RAEOA.
Jornalista : Felicidade Ximenes
Editór : Zezito Silva
