DILI, 04 maiu 2023(TATOLI) – Diretór Nasionál Saúde Públika iha Ministériu Saúde, Frederico Bosco, informa husi janeiru to’o marsu, ema ne’ebé mak mai konsulta iha fasilidade saúde sira hamutuk 434.649 iha teritóriu nasionál.
”Husi janeiru to’o marsu, totál ema ne’ebé mak mai konsulta iha fasilidade sira iha teritóriu nasionál hamutuk 434.649, entaun ida ne’e mak númeru konsulta ne’ebé mak ita relata iha fasilidade saúde hotu”, Frederico Bosco, dehan iha nia kna’ar fatin, ohin.
Nia hateten, populasaun iha ona hanoin atu asesu ba fasilidade saúde sira bainhira moras no hetan atendementu husi profisionál saúde sira.
”Husi númeru ida ne’ebé ha’u temi ne’e, ba moras daet sira ne’ebé relata maioria kazu afetadu sira mak dahuluk Infesaun Vias Respiratóriu (ISPA), mak baibain maioria husi komunidade sira kuandu sofre infesaun respiratóriu hanesan, inus metin, isin manas oituan, ulun fatuk moras no mós isin moras, ida ne’e mak durante fulan tolu nia-laran hamutuk 167.239”, nia afirma.
Nia dehan, kazu sira ne’e barak mak infesaun respiratóriu superiór no agudu, mak isin manas oituan, inus metin no ruin sira moras.
Depois iha mós kazu balun husi númeru ida ne’e, balun sofre infesaun respiratóriu baixu, ne’e mak moras ne’ebé mak hanaran pneomonia, ne’ebé durante fulan tolu ita rejista kuaze hamutuk 7.126. No iha mós kazu diarea agudu ne’ebé mak relata, durante fulan tolu ne’e hamutuk 15.711.
”Iha mós moras kulit ne’ebé mak ita relata husi fasilidade saúde sira durante fulan tolu kuaze iha 3.117”, nia sublina.
Aleinde ne’e, iha mós komunidade ka pasiente sira sofre kona-ba asidente, entaun sira mai hetan konsulta iha fasilidade saúde sira, asidente tantu husi, asidente tráfegu, asidente laborál ka servisu mak hetan asidente, ne’e kuaze iha 1.889. Depois iha mós moras daet husi relasaun sesuál, ne’ebé mak relata mós husi fasilidade saúde kuaze 1.181 kazu.
”Moras sira ne’ ho idade ne’ebé mak mai globál no jeralmente kuaze protesaun sira hanesan hotu, tantu husi labarik sira menus husi tinan ida, entre tinan ida to’o tinan haat, depois tinan lima to’o tinan 14, depois iha mós tinan 15 ba leten”, nia konklui.
Jornalista : Felicidade Ximenes
Editór : Zezito Silva