DILI, 05 maiu 2023 (TATOLI)—Embaixadór Indonézia iha Timor-Leste, Okto Dorinus Manik, sesta ne’e, hala’o enkontru ho Prezidente Repúblika (PR), José Ramos Horta, hodi relata preparativu Indonézia nian hanesan uma na’in ba konferénsia altu nível ASEAN ba dala 42, ne’ebé sei realiza iha Labuan Bajo, postu administrativu Komodo, munisípiu Manggarai Oeste, Provinsia Nusa Tenggara Timur (NTT) hosi loron 09-11 maiu 2023.
“Ami halo diskusaun ho Prezidente Repúblika kona-ba preparasaun Indonézia nian hanesan uma na’in ba Konferensi Tingkat Tinggi KTT ASEAN ne’ebé sei realiza iha Labuan Bajo no mós reparasaun Timor-Leste nian atu partisipa iha KTT ASEAN nee,” Embaixadór Okto Dorinus Manik hateten ba jornalista sira hafoin ramata enkontru ho Xefe Estadu, iha Palásiu Prezidensiáal Nicolau Lobato, Bairru Pite.
Nia dehan, delegasaun Timor-Leste nian ne’ebé atu partisipa iha konferénsia altu nível ne’e lidera hosi Primeiru-Ministru, Taur Matan Ruak, akompañadu hosi Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno.
Durante sorumutu, Xefe Estadu sei fó apoiu rezultadu hosi konferénsia altu nível ASEAN, liu-liu kona-ba adezaun Timor-Leste nian ba ASEAN.
Jornalista : Nelson de Sousa
Editór : Cancio Ximenes
