OÉ-CUSSE 05 maiu 2023 (TATOLI)– Empreza privadu Yieldplay Enerjia Lizu Lda, hosi nasaun Afrika Súl, sei harii investimentu enerjia renovável solár-panél ho kapasidade 5MW to’o 10MW iha Rejiaun Administrativa Espesiál Oé-Cusse Ambeno (RAEOA) ho kapitál investimentu millaun $12.
Ho investimentu ne’e, iha sesta ne’e, empreza privadu Yieldplay selebra akordu ho Autoridade Rejiaun Administrativa Espesiál Oé-Cusse Ambeno (RAEOA), lideradu Arsénio Paixão Bano, iha faze implementasaun téknika.
Diretór Promosaun Investimentu no Esportasaun, TradeInvest Timor-Leste, Ezaquel Babo, informa inisiativa ne’e fasilita hosi TradeInvest Timor-Leste, ho totál kapitál investimentu, empreza propoin atu investe iha Oé-Cusse hosi millaun $10 to’o millaun $12 ho produsaun enerjia ho kapasidade 5MW to’o 10MW.
“TradeInvest mai fasilita empreza privadu hosi Afrika Súl, atu investe iha setór enerjia renovavél solár-panél iha Oé-Cusse, entaun ho pedidu hosi empreza privadu Yieldplay Ernejia Lda, maka TradeInvest fasilita iha fulan kotuk, halo ona reuniaun dahuluk ho Autoridade RAEOA, parte rua konkorda atu avansa ba iha investimentu iha Oé-Cusse. Nune’e ohin kontinua fasilita nafatin ba selebrasaun ne’e hodi hakat ona ba negosiasaun ba faze implementasaun”, Diretór promosaun investimentu TradeInvest, ko’alia iha Oé-Cusse.
Iha biban hanesan, Diretór Operasionál empreza Yieldplay Enerjia Lizu Lda, Inacio Freitas Moreira, promete hodi reforsa kompaña hodi implementasaun investimentu ne’e ho kualidade, tanba iha futuru implementasaun empreza sei persiza traballadór na’in-200 no permanente na’in-40
“Kestaun téknika ne’e faze importante atu elabora power production egreement, ba mobilizasaun atu-bele hahú investimentu ne’e. Ohin ami propoin investimentu hahú hosi millaun $10 to’o $12, ba enerjia renovavél, bele providénsia 5mw to’o 10 mw, mak sei fornese ba populasaun sira iha Oé-Cusse ho kustu menús-liu, proposta ami propoin, KW hahú 0,06 to’o 0,075″, katak.
Entretantu, Prezidente Autoridade RAEOA, Arsénio Paixão Bano, orgullu ho investimentu ne’e importante ba Oé-Cusse, tanba iha futuru sei kontribui reseita ba kofre Estadu, hamenús dezempregu no hamenus kustu operasionál.
“Akordu ne’e, inisiátiva importante tebes ba RAEOA, tanba atu hamenus kustu operasionál eletrisidade iha Oé-Cusse, kada tinan ita gasta besik millaun $4-resin, ba operasionalizasaun power plant sentrál Inur Sakato”, nia afirma.
Tan ne’e, RAEOA sei iha kontratu ho empreza Wartsila, entaun sei fasilita formasaun, maibé hakarak hatún kustu operasionál inklui hatún pagamentu ba kliente eletrisidade, sira tenke iha opsaun seluk ba RAEOA, mak enerjia renovavél ba objetivu misaun hamosu sidade verde iha Oé-Cusse.
“Ha’u hanoin, akordu ne’e hanesan loke dalan diskusaun téknika, ita sei haree parte barak ba benefisia, liuliu empregu fó servisu ba Oé-Cusse oan, formasaun, no eduka mós populasaun atu uza enerjia renovavél, di’ak liu atu hamenús manas, entaun opsaun hili akordu ne’e importante tanba kustu ba RAEOA ladún iha, tanba investimentu ne’e kompañia ezekuta ho nia orsamentu rasik, maka mai atu investe iha ne’e,” nia orgullu.
Entretantu, partisipa iha selebrasaun akordu ofisiál ne’e mai hosi Country Project Manajér empreza Yieldplay Enerjia Lizu Lda, Fransisco da Costa Cabral, no membru Autoridade Oé-Cusse.
Jornalista: Abílio Elo Nini
Editór : Florencio Miranda Ximenes
